www.radioredondela.com Hoxe é Martes, 4 de Agosto de 2020

A crise inmobiliaria afecta ó sector en Redondela
Sociedade • 30/12/2010
Autor: Ana Prieto

A venta de pisos e casas experimentou un notable descenso nos últimos meses tanto en Galicia como no resto de España. Esa é a mesma tendencia que segue o sector en Redondela, prexudicado sobre todo pola actitude das entidades bancarias, que "pecharon a billa" do crédito. As dificultades para acceder a unha hipoteca limitan moito a venda de vivendas neste municipio, do mesmo xeito que no resto da comunidade.


A compravenda de vivendas baixou un 20% en Galicia o pasado mes de outubro, en comparación co mesmo mes do ano anterior. O descenso no resto de España foi algo inferior, do 17,7%. En todo caso, a tendencia xeral vén marcada por ese retroceso nas ventas, e o caso de Redondela non é unha excepción. Bernardo Fernández, da Inmobiliaria Arines, explica que as ventas baixaron neste Concello nos últimos meses por mor da crise. O motivo, sobre todo, a falta de crédito por parte das entidades financeiras, que agora esixen moitas máis garantías á hora de conceder unha hipoteca. Con todo, sinala que neste municipio "non se dan os picos" doutros Concellos veciños como Soutomaior ou O Porriño, onde houbo moita construción nos últimos anos. Fernández Arines compara a tendencia en Redondela cun "motor diésel", cunha evolución "lenta pero constante", xa que non se deu un gran auxe da construción nos últimos anos, nin tampouco grandes caídas. O número de vivendas novas que se edifican mantense máis ou menos estable ano tras ano.


Enclave privilexiado


O interese dos compradores por adquirir unha vivenda en Redondela segue a ser elevado. Fernández explica que se trata dun municipio que ten moito atractivo, mesmo para cidadáns doutros lugares veciños, como Vigo. Redondela está nun enclave "privilexiado", a escasos minutos da cidade olívica, e as vivendas teñen prezos "máis baratos", ademais de que goza dunha boa calidade de vida. Por iso a demanda de pisos e casas segue a ser alta en Redondela, o problema é que os compradores teñen moi difícil atopar financiamento, xa que os bancos esixen cada vez máis garantías. O próximo 2011 seguirá a ser un ano de dificultades no sector. Con todo, desde a Inmobiliaria Arines agardan tamén que, coa aprobación do PXOM se constrúa máis vivenda en Redondela e se dinamice o sector.

Comentarios
Aylaleylo
Martes 4 de Xaneiro de 2011 ás 19:18 horas
¿E porqué non falades do precio? . Se baixou a demanda de vivendas en Redondela non toda a culpa a ten a banca por pechar "a villa dos crédito" se non tamén porque os promotores non se queren adaptar o mercado actual e baixar os prezos das vivendas para axustar oferta e demanda. Asi que, Sr.Fernández, si quere vender máis deberá decirlle os seus amigos constructores/promotores que rebaixen de unha vez por todas os prezos porque do contrario se van a quedar cos inmobles os bancos, é logo os acusaredes de competencia desleal.
Harpo Marx
Domingo 2 de Xaneiro de 2011 ás 17:00 horas
Dende www.faloderedondela.es.tl queremos agradecer a colaboración totalmente desinteresada que tivo Radio Redondela connosco. Como de ben nacido é ser agradecido, vémonos obrigados a poñernos aos pés do Sr. Pazos polo comportamento que tivo connosco, permitíndonos a utilización das súas infraestruturas, como medio publicitario da nosa páxina. Por todo isto, só podemos dicir que Deus vos garde moitos anos, pero moitos, moitos... tanto a ti coma a Dña. Cecilia.
[1-2]

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: