www.radioredondela.com Hoxe é Sábado, 4 de Abril de 2020

Chapela demanda servizos de proximidade tras licitar Fomento unha nova estación de tren
Sociedade • 27/09/2011
Autor: Ana Prieto

Os veciños de Chapela contarán cunha nova estación de tren. O Ministerio de Fomento licitou o proxecto logo de que o actual apeadeiro da parroquia quedara en desuso hai un mes. As obras do AVE desviaron o tráfico ferroviario á nova estación de Guixar, en Vigo, e os trens deixaron de utilizar o ramal de Urzáiz a Redondela. Desde o primeiro momento os veciños e colectivos como a plataforma "Salva o tren", reclamaron un novo apeadeiro para Chapela, que agora se fai oficial.


O Ministerio de Fomento anunciou que a nova estación se situará na liña Redondela-Chapela, e estará próxima á que xa existe na actualidade. A licitación do proxecto ascende a 150.000 euros e incluirá unha análise de alternativas á localización da terminal, estudos xeolóxicos, movementos de terras e estruturas.


Desde a plataforma "Salva o tren" entenden que este é un primeiro paso a favor dos colectivos que demandan un servizo de trens de proximidade. Agardan tamén que se liciten proxectos semellantes noutros municipios para favorecer o uso do transporte público en toda a Área Metropolitana.


Os veciños de Chapela agardan que esta nova estación supoña un servizo de trens constante, e lamentan a perda paulatina dos servizos ferroviarios tanto no apeadeiro da parroquia como na propia estación de Redondela. Na actualidade moitos usuarios da zona fan o traxecto ata a nova estación de Guixar e logo teñen que facer o perorrido de volta cara Chapela en taxi ou en vehículo particular. A Asociación de Veciños agarda tamén que co proxecto da nova estación se resolvan os problemas dos accesos na contorna da vía, tanto para os peóns como para os vehículos.


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: