www.radioredondela.com Hoxe é Martes, 17 de Outubro de 2017

Xurxo Lobato "O que me atraeu de Rosalía foi a súa modernidade"
Cultura • 5/10/2017
Autor: M. X. Queimaliños

O fotógrafo achega ao Multiúsos a exposición "Airiños, aires, Rosalía", unha mirada persoal ao mundo rosaliano. A través das súas imaxes, que se poden visitar at finais de outubro, Lobato traza a traxectoria vital e emocional de Rosalía de Castro. Faino a través das imaxes cun percorrido polas primeiras etapas vitais da escritora dende o seu Padrón natal, pasando por Santiago de Compostela lugar no que a poeta residiu e estudou. Pódese ver a pia bautismal na que foi bautizada, así como diferentes rúas polas que transitou, pero tamén lugares emblemáticos que forman parte da súa obra como as Campanas de Bastabales, Lestrobe ou as Torres de Oeste.


Na inauguración da mostra que está integrada por medio centro de fotografías a gran formato, Xurxo Lobato salientaba que se trata dun "traballo persoal, de autor, unha mirada cara o mundo rosaliano con paradas nos lugares nos que Rosalía viviu ou que para ela tiñan importancia".


O fotógrafo achegase a nosa escritora universal por diferentes motivos, entre os que salienta a súa modernidade, sobre todo como feminista na defensa da muller nunha época na que estaban relegadas ao papel de esposa e tamén pola súa actitude ecoloxista. Aspectos que amosan a modernidade de Rosalía.


Unhas fotos que ao entender do técnico de Normalización Lingüística "axúdannos a comprender a vida de Rosalía e os lugares que van marcar a súa obra".


Lugares aos que facía referencia o presidente da Fundación Rosalía de Castro, Anxo Angueira quen destacaba tamén o feito de que Redondela sexa o primeiro concello que alberga esta exposición itinerante que xa pasou polas grandes cidades galegas.


Dende a Concellería de Cultura puxeron o acento no valor desta exposición para chamar a atención sobre os aspectos menos coñecidos de Rosalía de Castro, que antes de poeta foi novelistas e en cuxas primeiras obras "xa presentaba unha prosa innovadora e rachaba con cadeas" en palabras de Teresa París.


En resumo, unha mostra fotográfica que ao entender do alcalde Javier Bas "prestixia Redondela" e que está enmarcada dentro dunha programación "que contribúe ao galeguismo integrador e non excluinte que se desenvolve dende o Concello".


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: