www.radioredondela.com Hoxe é Luns, 24 de Xuño de 2019

Barbies contra a desigualdade
Cultura • 8/01/2019
Autor: M. X. Queimaliños

O Concello de Pazos acolle unha rompedora exposición con bonecas Barbies como protagonistas. A mostra amosa estas bonecas, arquetipo da "muller obxecto", en situacións de desigualdade, violencia e discriminación. Unha exposición que leva por nome "Rompe. Xoga en iguladade" impulsada pola Deputación de Pontevedra para denunciar a discriminación e a desigualdade que sofren as mulleres. Poderá verse ata o 31 de xaneiro de luns a venres, en horario de 9:00 a 14:00 horas.


"Rompe. Xoga en Igualdade" é unha exposición itinerante creada por Isabel Blanco e Irene Silva e con fotografías de Noemí Chantada. Está protagonizada polas famosas bonecas "Barbie", que foron intervidas para denunciar de forma impactante e rompedora a desigualdade entre homes e mulleres. Trátase dunha mostra vangardista e rompedora para golpear as conciencias e para facer pensar e reflexionar, cuxo obxectivo é non deixar a ninguén indiferente. Pretende "romper" e reivindicar a igualdade entre mulleres e homes, así como concienciar á sociedade da igualdade de oportunidades entre mulleres e home e do fin da discriminación e da violencia contra o 52% da poboación. Para lograr estes obxectivos hai que "romper" e traballar arreo para evitar a invisibilidade das mulleres.


"Rompe. Xoga en Igualdade" consta de 18 paneis cheos de poesía visual que teñen por obxectivo cambiar o mundo e golpear as conciencias. Así, as protagonistas dos paneis amosan as situacións de desigualdade, violencia e discriminación que viven as mulleres dende nenas, recalcando a importancia do xogo para a educación, transmisión de valores e formación de nenas e nenos. As bonecas seleccionadas para a mostra foi a "Barbie" por tratarse da máis famosa da historia e coa que, a diario, xogan milleiros de nenas no mundo, pero que, ao mesmo tempo, presenta a unha muller obxecto que transmite valores sexistas que se están a reproducir tanto nos xogos como nas condutas dos nenos e nenas.


 

Comentarios

ENVÍA A TÚA OPINIÓN
 
Nome e Apelidos   Correo Electrónico (opcional)
 
Comentario:

Imaxe de Verificación:
Escriba o Código: