No mes de setembro do 2008 comezaba a súa andaina "Cancións para Xordos". Un programa musical que a Radio Municipal de Redondela decidía introducir na súa programación de nova temporada. Media hora de música precisamente para aqueles que xa non lles queda máis remedio que facerse os xordos, fartos dos convecionalismos, das cancións mil veces escoitadas e emitidas.

Trinta minutos nos que poderedes atopar todo o referente a novas tendencias musicais no eido independente. Desde os grupos que están emerxendo na escena española a aqueles que se atopan a máis de dez mil quilómetros de distancia.
Novos disco, novos proxectos, cos que cada día tentamos sorprender a nosa audiencia, sen repeticións nin cortes publicitarios. Traballos que aínda non están a venda, que xa están descatalogados ou que rematan de saír son os protagonistas de Cancións para Xordos.

Incidindo nese afán por descubrir e indagar no panorama indie, cada luns presentamos o noso "Disco da Semana". Un traballo que remata ou está a piques de saír a venda e que consideramos que pola súa calidade debe ser coñecido máis polo miúdo. Así dende o luns e ata o venres imos escoitando cada un dos temas que compoñen o disco elixido, cada día unha peza, o que lles permite aos nosos seguidores máis fieis ter un coñecemento máis profundo desa banda e do seu traballo

Desde o rock o pop, pasando polo funk o punk, o folk ou a new wave teñen cabida en Cancións para Xordos, que ademais todos os venres, conta coa colaboración do Deseñador Rudu, que cada semana nos achega súa escolla musical. Unha selección de media hora de música, na que sempre nos descubre novos traballos.

Autor: Lorena Otero

Horario: Luns, Mércores e Venres 13.00 -13.30

Remisión 17.10 - 17.40