O colectivo convoca aos veciños a unha asemblea no Multiusos do Pieñeiral o sábado 20 ás 18:00 horas. Presentarase aos asistentes o informe elaborado para acompañar o contencioso administrativo que teñen aberto contra o Ministerio de Medio Ambiente.
A asociación de afectados pola ampliación da autoestrada AP-9 ao seu paso por Chapela convoca aos veciños a unha asemblea informativa que se vai celebrar o vindeiro sábado día 20 no Multiusos do Piñeiral ás 18:00 horas. O obxectivo é trasladar aos asistentes o informe de impacto ambiental que o colectivo presentará ante a Audiencia Nacional para avalar o contencioso administrativo que teñen presentado contra o Ministerio de medio Ambiente.
Con esta documentación os afectados queren demostrar a necesidade de que dende as administracións se esixa como trámite imprescindible a Fomento a elaboración dun estudo de impacto ambiental que analice polo miúdo as consecuencias que a ampliación de Rande tería para a contorna.
Aseguran que os estudos realizados ata o de agora tanto pola concesionaria da autoestrada Audasa como polo propio ministerio son “pobres e feitos a correr” e denuncian que as persoas que están a vivir preto da autoestrada levan anos sufrindo a contaminación ambiental e acústica sen saber os riscos que isto provoca, “algo que dende as administración lonxe de solucionalo aínda queren agravar coa ampliación da vía”.
