A presidenta Carmela Silva fai balance de xestión dos últimos dous mandatos nos que a Administración provincial “investiu un 87% máis que cando gobernaba o PP”. En toda a comarca- Redondela, Soutomaior, Pazos e Fornelos- nestes oito anos teríanse investido máis de 32 millóns de euros “sempre baixo criterios obxectivos e favorecendo a todos os concellos independentemente de cal sexa o partido que os goberne”. Aproveitou a súa presenza en Redondela para criticar o abandono da Avenida Mendiño por parte da Xunta “o goberno galego decidiu paralizar a actuación cando o PP perdeu a alcaldía”.
A Deputación alcanza un investimento acumulado de 32,2 millóns de euros nos concellos Redondela, Fornelos de Montes, Pazos de Borbén e Soutomaior. A presidenta, Carmela Silva, fixo balance de xestión na recta final deste segundo mandato á fronte da Administración provincial reivindicando a necesidade de comunicar a cidadanía que se fai cos cartos público “demostrando con datos que transformamos esta provincia con investimentos estables tódolos anos e tamén con cero euros de libre disposición, en contraste cos 20 millóns que o anterior presidente da Deputación manexaba tódolos anos ao seu criterio”.
A presidenta comentou especificamente o caso de Redondela, para recordar que “a Xunta asinou co anterior alcalde do PP un deses convenios a dedo para obras de humanización da avenida de Mendiño con 1,6 millóns de euros, pero en canto perderon o Goberno de Redondela paralizaron o proxecto e decidiron incumprir cun convenio asinado” cualificando de “vergoñento” o estado no que se atopa esa estrada.
No seu percorrido polos concellos puntualizou que nestes dous últimos mandatos Redondela recibiu 14,4 millóns de euros millóns de euros; Fornelos de Montes, 6,2 millóns de euros; Pazos de Borbén, 4,9 millóns de euros e Soutomaior, 6,7 millóns de euros. Un fluxo que chegou maioritariamente do Plan Concellos, que se distribúe anualmente con criterios nos que se valora a poboación, extensión e dispersión. A este reparto, Carmela Silva, sumou ademais os 1,8 millóns de euros investidos pola Deputación nestes últimos anos na posta en valor da “xoia” que é castelo de Soutomaior, co gran proxecto de musealización á cabeza de tódalas intervencións. Adiantou que hai presentado un proxecto de 3 millóns de euros aos fondos Next Generation para facer “un cambio espectacular” na iluminación do castelo e os seus xardíns. “Hoxe é un castelo da xente, para o turismo e a cultura, e xa non un mero recurso para actos electorais do PP”.
Puntualizou tamén como obras salientables en Redondela, entre as 51 executadas, a humanización da avenida de Santa Mariña (a piques de rematar), a ampliación do paso superior sobre a liña férrea en Os Valos, ou a pavimentación da contorna do Pazo de Torres de Agrelo. Lembrou que a día de hoxe estase construíndo o aparcamento de Vilavella (546.536 euros) ou a renovación de redes de servizos no camiño de Cidadelle (355.465 euros).
En Fornelos de Montes o Plan Concellos financiou 39 obras (3,1 millóns de euros), como pavimentacións e ensanches de camiños, a reforma do centro cultural de Pardalongas ou a plataforma para a cafetería da praia fluvial de Portovilán. Agora mesmo estanse realizando melloras rurais en Calvos e pavimentando camiños, por valor de máis de 160.000 euros. En Pazos de Borbén, 26 obras (3,3 millóns de euros) para ampliar saneamentos, pavimentacións e construír a senda peonil e ciclista entre Moscoso e Xunqueiras. Nestes intres estase reformando o centro social de Cepeda (103.447 euros) e acondicionando a zona deportiva de Nespereira (49.231 euros). Finalmente, en Soutomaior executáronse 51 obras (4,4 millóns de euros) para mellorar fontes e lavadoiros, humanizar a rúa do Peirao (Arcade) e habilitar o local multifuncional de Moreira. Entre as actuacións en marcha están a humanización da rúa Lameiriña e praza de Cimadevila (286.208 euros) ou a pavimentación de camiños en Barreiros, O Conde, Piñeiro e Rial (206.365 euros).
Estrada Amoedo-Os Valos
A presidenta da Deputación falou tamén das estradas provinciais da comarca insistindo en que “ningunha Administración fai un investimento comparable pola mellora e mantemento da súa rede, a pesar de que as estradas provinciais suman máis quilometraxe na nosa provincia que as estatais e autonómicas xuntas”. Destacou entre outras obras a transformación da estrada redondelá de Os Valos-Guizán, con 402.341 euros para dotala de senda peonil e plataformas de convivencia con preferencia para as persoas. Detívose especialmente no caso da estrada de Amoedo a Os Valos tan demandada pola veciñanza e “que a Deputación leva catro anos tratando de impulsar, cunha actuación de ensanche e pavimentación de 968.384 euros e que sufriu ata o de agora a falta de colaboración municipal para a ampliación da sección da vía. Ademais, avanzou a presidenta provincial, a Deputación quere continuar esta obra cunha segunda fase en torno ao núcleo de Nespereira, que incluirá unha senda peonil no marco do modelo de mobilidade integral.
