O concurso ‘Voces de Redondela’ xa ten a lista dos 10 semifinalistas que competirán polo primeiro posto nunha gala aberta ao público o próximo venres 28 de abril ás 19:00 horas no Auditorio do Multiusos da Xunqueira.
Para chegar ata aquí os e as participantes tiveron que pasar dúas probas eliminatorias con voto popular. O proceso seguíase a través da páxina web do concurso e tivo unha resposta de 1127 votos únicos contabilizados, algo que a creadora do concurso Pilar Moráguez califica de “éxito rotundo”.
Estes novos talentos teñen idades comprendidas entre os 9 e os 17 e, aínda que comparten o seu amor polo canto, teñen distintos gustos musicais e niveis de profesionalidade. A maioría son amateur e enfróntanse por primeira vez o 28 de abril a unha actuación en directo diante dun xurado, polo que Moráguez encargouse de facilitar clases maxistrais para que suban ao escenario con confianza.
Os resultados desta semifinal foron moi axustados, a puntuación máxima era de 5 puntos. O primeiro posto obtívoo Lucía Castro con 4,77 puntos e o décimo Tiago González con 3,74. A soprano quere deixar claro que “todos son gañadores” e que o importante “é ter unha boa experiencia e aprender”.
A gala estará aberta ao público e contará con moitas sorpresas e premios aportados polos comerciantes de Redondela aos que Pilar Moráguez quere “agradecer a súa colaboración”. O primeiro premio será un curso completo de canto, o segundo e terceiro premio son 6 meses de balde no coro infantil de Redondela e moitos máis agasallos.
O xurado da final está formado polos músicos redondeláns Alberto Vilas e Fran López, a profesora do Conservatorio Superior de Vigo Beatriz Riobó e o pianista Arabel Moráguez. Estes valorarán a actuación en directo, a posta en escena e por suposto a voz e a habilidade para cantar.
A gala celebrarase o 28 de abril ás 19:00 horas no Multiusos da Xunqueira. Está aberta ao público, é de balde e non precisa de inscrición previa.
RESULTADOS SEMIFINAL
1 Lucia Castro 4,77 puntos
2 Saúl Amoedo 4,28 puntos
3 Jorge Enrique Pazo 4,19 puntos
4 Anabella Madrigal 4,17 puntos
5 Manuel Campo 4,15 puntos
6 Noa Vaz 4,04 puntos
7 Julia Feás 3.95 puntos
8 Ana Anselin 3,94 puntos
9 Hanna Fikirte 3,81 puntos
10 Tiago González 3,74 puntos
Para máis información: https://pilarmoraguez.com/
