Os nacionalistas propoñen un proxecto en consonancia co que se está a facer en Europa con estes espazos comerciais e que parten dunha reforma que fusione a modernidade e a tradición para transformar un espazo “que está morto a día de hoxe, nun lugar de ocio no que convivan negocios de abastos con outros de hostalaría e restauración”. Neste sentido, entenden que o proxecto de recuperación debe afectar a toda a contorna de Xosé Solla.
O candidato do BNG, Manu Lourenzo sinalou que “ as prazas de abastos son o termómetro da vitalidade dun pobo e o que di o termómetro neste caso é que Arcade está morto. A praza despois de máis de medio século sendo un lugar dinámico hoxe por hoxe ten a reixa baixada e ese é unha imaxe ben ilustrativa do que está a acontecer co comercio local de Arcade”.
A recuperación da praza pasa por recuperar toda a contorna “para que o centro de Arcade deixe de ser un espazo abandonado, coas beirarrúas desfeitas e cun tráfico caótico”. Xosé Solla e a praza poden e deben converterse, insiste Lourenzo, nunha zona agradable na que haxa amplas zonas de aparcamento, persoas comprando e familias paseando por un espazo urbano atractivo e dinámico. Se non damos ese paso estaremos condenando á veciñanza e aos negocios a vivir nun espazo que cada vez é máis suburbial .
