“Falsificouse a firma dun arquitecto nun proxecto de mellora do mercado de Abastos alo menos en dúas ocasións” así o afirma o voceiro do PP, Javier Bas quen apunta á alcaldesa Digna Rivas como responsable destas irregularidades detectadas nunha petición de subvención presentada ao Ministerio de Industria para acceder a unha axuda de 1,5 millóns de euros que finamente foi denegada. A edil Ana Alonso asegura que se trata dun “delito de falsidade documental” e esixe depurar responsabilidades.
A alcaldesa “firmou e enviou documentación falsificada para unha subvención para a reforma do mercado de Abastos e ocultou esta gravísima irregularidade ata que o Partido Popular o denunciou” asegura o voceiro do PP, Javier Bas quen adianta que están a espera de que se resolva a investigación en marcha para “decidir que pasos imos dar a continuación”.
En todo caso, adianta que “chegarán ata o final” para coñecer quen está detrás das irregularidades detectadas.
Irregularidades que poderían incorrer nun “delito de falsidade documental” xa que o goberno local na vez de redactar un proxecto novo para solicitar dita axuda “optou por presentar un proxecto do ano 2021 e falsificar a sinatura do arquitecto saltándose algo tan sinxelo como falar con arquitecto e solicitarlle que asinara a documentación”.
Engaden que esta irregularidade “non é obra nin dun técnico nin de ningún funcionario” e apuntan directamente aos cargos políticos “que deciden concorrer a esta convocatoria de subvención a última hora e, posiblemente polas présas, na vez de realizar o procedemento correctamente deciden recuperar a documentación de hai dous anos cun copia e pega da sinatura do arquitecto”.
Por este motivo, esixen a depuración de responsabilidades “ao máximo nivel” xa que foi a rexedora quen certificou os proxectos presentados mentres que o arquitecto que presuntamente tería asinado esa documentación xa deixou claro nun escrito enviado ao concello que “non tiña ningunha relación contractual nin documental con esa solicitude”.
