Pais e nais da asociación “Facendo Camiño” do IES de Soutomaior denuncian a falta de resposta da Administración Educativa ás súas demandas que buscan resolver as deficiencias que presenta o centro educativo, tanto a nivel de instalacións –con pingueiras no ximnasio que xeran un ambiente insalubre- como de atención á diversidade.
A situación actual segundo explican deriva en graves problemas de masificación nas aulas (debido a ratios que rozan o límite máximo mentres que a dimensión das aulas se axusta ao mínimo requirido), falta de persoal especializado na atención ás necesidades especiais, sobrecarga de traballo no profesorado e aumento das situacións de incapacidade temporal.
Critican que a inspección educativa denegara a concesión dun Plan de Diversificación Curricular (PDC), unha das poucas medidas das que pode facer uso o centro xa que non supón custe engadido para administración. Esta denegación que aseguran “non está xustificada conforme á lexislación vixente e trasladada xusto ao inicio do curso” obrigou a reestruturar as aulas e os horarios do alumnado co curso xa empezado.
Engaden que malia ter remitido tres escritos á Xefatura Territorial de Pontevedra, dende a administración non obtiveron resposta polo que decidiron poñer en coñecemento do conselleiro de Educación a situación do IES de Soutomaior e o malestar das familias “negándosenos lexitimidade para intervir como parte interesada”.
Finalmente critican que tras publicarse o investimento que a Consellería de Educación prevé para varios IES de Redondela e Pontevedra “comprobamos unha vez máis que o IES de Soutomaior non ve atendidas as súas demandas, especialmente as que precisan dunha atención máis inmediata, como as pingueiras do ximnasio (xa notificadas o curso pasado), que xeran un ambiente insalubre no espazo no que o alumnado realiza deporte”.
