O Ciclo de teatro infantil que organiza o concello de Redondela propón para esta fin de semana unha nova actuación no Multiúsos da Xunqueira. Será o domingo 31 ás 18:00 horas coa compañía Caramuxo teatro e o espectáculo A nena que vivía nunha caixa de mistos. O prezo da entrada é de 3 euros.
Caramuxo é unha compañía especializada na creación de espectáculos poéticos e visuais axeitados para gozar en familia, tendo unha especial responsabilidade co público mais novo, mesturando diferentes técnicas, teatro de actor, monicreques, danza.. Nesta ocasión presentan a obra “A nena que vivía nunha caixa de mistos” inspirada no conto “A vendedora de mistos” de Andersen. Unha peza cunha linguaxe contemporánea e multidisciplinar que trata o tema da pobreza infantil e a orfandade, mais cunha mensaxe positiva, sobre o poder do cambio. Unha proposta de teatro de actriz e monicreques case sen palabras, que lembra ás películas clásicas en branco e negro.
O espectáculo, que conta con música en directo, é a terceira pata da triloxía sobre os contos populares, que comezou con “As fabas máxicas”, continuou con “Feo” (Premio María Casares a Mellor Espectáculo Infantil) e remata con esta proposta.
