O goberno explica que a nave que vai ser derrubada en Vilavella ten amianto, un material cuxa retirada precisa dun tratamento especial e que está pendente dunha autorización que xa foi solicitada a Xunta a finais de decembro. Rexeitan así as críticas de AER que acusaban ao goberno local de “parálise na execución deste proxecto”.
Asegura a alcaldesa Digna Rivas que están pendente da autorización do goberno galego para realizar esta actuación “un procedemento imprescindible para comezar a obra de forma segura e cuxa autorización foi solicitada o pasado 27 de decembro”.
Falan dende o goberno local “dunha pequena demora no proxecto” debido a que “a retirada do amianto é un proceso necesario e que conleva un risco, polo que ten un procedemento concreto e minucioso para poder facer a obra sen que ninguén corra perigo”.
Dende o concello explican que xa tiñan en conta o amianto dentro do plan do proxecto e que “todo continúa o seu curso normal”. En canto reciban a autorización comezarán co derrubamento da nave e a construción do estacionamento proxectado que contará “con decenas de prazas e permitirá dispoñer dun espazo próximo ao centro urbano e continuar coa transformación iniciada polo Goberno local no marco da mobilidade sostible e da recuperación de espazos públicos para a cidadanía”.
A estratéxica situación do aparcadoiro disuasorio –xusto na entrada do centro urbano– permitirá a desmasificación de estacionamentos de vehículos que, diariamente, se produce nas beiravías da estrada. Este aparcadoiro complementará aos dous aparcadoiros libres existentes no casco urbano reforzados polo aparcadoiro soterrado da Xunqueira.
