Un texto publicado por Xerais no que fai un percorrido por 500 anos de persecución ao noso idioma recompilando numerosos documentos históricos, dende o ano 1480 ata finais do século XX. A presentación terá lugar o mércores 12 ás 20:00 horas no Multiúsos da Xunqueira a cargo de Carlos Callón.
Profesor de Xeografía e historia e durante anos cabeza visible da Mesa Pola Normalización Lingüística, Carlos Callón achégase a Redondela para presentar o texto “O libro negro da lingua galega”, unha obra que se centra na represión existente na lingua galega dende o século XV ata a actualidade.
No texto presta especial atención a represión padecida polo idioma dende as escolas “especialmente dura e especialmente continuada”, lembrando que non só é no período do franquismo cando se incide directamente sobre os máis novos para evitar que falen en galego, senón que esta represión remóntase séculos atrás e se prolonga máis aló de superado o franquismo.
Con todo, salienta que malia ese intento por acabar coa nosa lingua durante séculos, o galego “malia as dificultades, segue a falarse e segue vivo”.
Callón está a percorrer diversas localidades galegas presentando este libro, e este mércores chega tamén a Redondela da man do Servizo de Normalización Lingüística quen organiza tamén este venres día 14 a proxección do documental “Beiras. Vivir 2 veces” no Multiúsos da Xunqueira, ás 19:30 horas con presenza de Xosé Manuel Beiras.
