Co obxectivo de recuperar a praia de Cesantes, os recursos pesqueiros e o fluxo natural das correntes, o grupo nacionalista presentou unha emenda parcial ás contas autonómica do 2010 para a construción dun peirao flotante en Redondela.
A deputada nacionalista Carmen Adán reuniuse esta mañá cos responsables da Confraría de Pescadores de Redondela para exporlle o contido da emenda parcial que o BNG presentou aos Orzamentos da Xunta do vindeiro ano para a recuperación da contorna natural dos areais redondeláns e da riqueza pesqueira da Enseada. A principal reivindicación que recolle a emenda é a construción dun peirao sobre pilotes que suporía evitar a perda de area que está a sufrir o Areal de Cesantes nos últimos anos, a recuperación da circulación das correntes e das riqueza pesqueira da zona.
Unha obra que a deputada nacionalista, cualificaba de “razoable, asumible e responsable” e que, segundo dixo, responde a “unha demanda que dende hai tempo vén facendo a confraría de pescadores local”.
A emenda recolle unha partida orzamentaria para o vindeiro ano de 300.000 euros, que sería “suficiente”, segundo Adán, “para elaborar o proxecto e comezar a obra”. A deputada, que estivo acompañada na súa visita polo responsable local do partido, Xoán Carlos González, salientou que esta obra permitirá dotar a Redondela dun porto moderno de primeira categoría ademais de mellorar a produción da Enseada, a súa riqueza natural, así como convertelo nun atractivo turístico para a zona.
O concello xa manifestou o seu apoio ao proxecto, a través do Tenente de Alcalde, Carlos Pazos, quen afirmou que esta é un dos principais problemas ambientais que ten Redondela e que, deste xeito, quedaría solucionado, polo que colaborarán na posta en marcha do proxecto.
