As persoas interesadas en participar deben facer a súa inscrición no Multiusos da Xunqueira antes do venres día 27. O concello repartirá este ano 1.800 euros en premios entre os Maios participantes, nas categorías de maio tradicional e artístico, coplas e interpretación. Cultura rebaixa a axuda que recibirá cada agrupación participante para colaborar na elaboración do Maio e que pasa dos 50 euros do ano pasado aos 30 euros desta edición.
As agrupacións que se presenten deberán gardar unha unidade temática tanto no seu vestiario coma na súa actuación. No apartado de maio tradicional incluiranse tan só os construídos con forma cónica empregando materiais vexetais, especialmente fiúncho, pampullo, peonias, laranxas e flores diversas, mentres que na categoría de maio artístico si terán cabida o resto das formas. O único material non vexetal permitido para a decoración dos Maios nas dúas categorías é a casca de ovo.
En canto ás coplas deberán estar escritas en normativa oficial e será imprescindible que cada maio conte como mínimo con catorce coplas das que seis serán interpretadas diante do xurado.
Os Maios galardoados poderán facerse cun premio en metálico de 200 euros para o primeiro clasificado e 150 o segundo, mentres que o terceiro clasificado en cada unha das categorías recibirá cen euros.
