A Garda Civil incautou na súa horta ata 84 plantas, con tamaños desde os 75 centímetros ata os 3 metros de altura. Logo de esfollar as plantas o resultado foron 24 quilos de marihuana. O detido carece de antecedentes policiais.
Axentes da Garda Civil do posto de Fornelos de Montes detiveron neste municipio a un mozo, R.R.R., de 19 anos de idade, como presunto autor dun delito contra a saúde pública, por ser o propietario dunha plantación onde había 84 exemplares de marihuana. Segundo informa o Instituto Armado, o arresto do mozo produciuse o pasado mércores, no marco das investigacións que as forzas de seguridade veñen realizando para erradicar a venda e o cultivo de plantas estupefacientes.
As xestións realizadas polos axentes do posto de Fornelos permitiron localizar a plantación, que estaba ao aire libre nunha horta. Non é o único caso na comarca nas últimas semanas. A Policía Local de Redondela localizou a finais do pasado mes de agosto outra plantación nunha leira de Cesantes na que se agochaban un total de oito plantas de marihuana, cun peso total de 5,5 quilos.
