O equipo de Jacobo Montes fíxose coa vitoria en Santa Mariña diante do Alondras. Os primeiros minutos de xogo, de total dominio local, foron fundamentais para lograr un traballado triunfo. O recentemente incorporado Pablo Couñago abriu o marcado, ao que se sumaron goles de Albert e Manu Lojo. Os resultados dos equipos locais tamén foron positivos na Segunda e Terceira Autonómica.
Terceira División
Choco 3-2 Alondras
Empezou o Choco dominando o encontro e aos dez minutos Pablo Couñago adiantou aos locais, e tan só catro minutos despois Albert aumentaba a diferenza lanzando unha falta que chocou na barreira antes de entrar. Coa entrada no terreo de xogo de Carlos Campo por parte do Alondras, o equipo cangués empezou a tomar as rendas do partido, e sería o propio Carlos quen marcaría o primeiro dos goles dos visitantes, transformando unha falta. Durante a segunda parte o Alondras saíu ao campo para levar o partido pero o Choco, moi ben colocado, soubo manter a vantaxe e aproveitar os erros do equipo visitante para levar os tres puntos. A cinco minutos do final Manu Lojo marcaba o terceiro gol dos locais. Despois de practicamente sentenciar o partido, o Choco impediu que o Alondras chegase á área contraria. Sería Joni quen marcaría o segundo gol visitante, xa no minuto 88, o que recortaba distancias, pero xa non quedaba tempo para máis, e o 3-2 sería o marcador definitivo. Desta maneira o Choco logrou unha nova vitoria, a sexta nas últimas oito xornadas. Os redondeláns mantéñense na sexta praza, empatado co Pontevedra e a un punto do cuarto. Na próxima xornada xógase o R.Bouzas-Choco, co equipo vigués situado na metade baixa da táboa.
Segunda Autonómica
Choco B 1-1 Chaín
O filial do Choco conseguiu sumar un importante punto diante do líder, o Chaín, e mantén a 10º posto na táboa. A próxima xornada xogan no campo do At.Matamá, cos vigueses situados na metade baixa da táboa.
Marín B 0-4 Soutomaior
O Soutomaior goleou a domicilio no campo do pechacancelas, o Marín B, que só suma un punto nas dez xornadas de liga. Os de Soutomaior son 12º, na próxima xornada Soutomaior-Noalla.
Beluso 1-2 Arcade
O Arcade acadou unha importante vitoria a domicilio diante dun dos equipos máis fortes do grupo. A próxima fin de semana ao Vilanova, da metade baixa da táboa.
Terceira Autonómica
Cesantes 2-3 Poio
O Cesantes non puido cun dos equipos fortes do seu grupo, o Poio, pero protagonizou un encontro con moitas ocasións. Con todo, a derrota déixaos na parte baixa da clasificación, e o domingo xogarán no campo do Cerponzóns, conxunto necesitado tamén de puntos.
Balaídos 0-3 Chapela
O Chapela está a consolidarse como un dos equipos máis fortes do grupo, xa son 3º na táboa, empatados co 2º o Alcabre, e a tan só un punto do líder, o Miño. A contudnente vitoria no campo do Balaídos manteno na loita polo ascenso. A próxima fin de semana reciben ao Vincios, o seu inmediato perseguidor.
At.Vilar 2-2 Mosende
Reparto de puntos nun encontro moi igualado, que deixa ao Vilar no ecuador da clasificación. O próximo domingo xoga no campo do Alcabre, 2º do grupo.
Tebra 3-2 Nespereira
O duelo entre dous dos equipos máis fortes do grupo saldouse a favor dos locais, co que os de Pazos baixan ata a 4ª praza do grupo. O domingo xogan diante do Barciademera, da metade baixa da táboa.
