A dirección de Anova Irmandade Nacionalista expulsa a 17 militantes desta formación política en Redondela logo de que así o acordase a comisión de ética e garantías que tramitou o expediente contra estes militantes próximos, na súa maior parte, á FPG.
Anova Redondela confía en deixar pechado definitivamente un problema interno que se veu desenvolvendo nos últimos meses no seo da formación local logo de que un grupo de 17 militantes “usurpara” o nome da formación, organizando actividades de xeito paralelo, e que levou incluso a que o líder da formación Xosé Manuel Beiras se achegase á localidade.
A expulsión dos militantes “díscolos” saltou aos medios de comunicación nesta fin de semana aínda que a expulsión foi efectiva hai xa días logo de que a comisión de ética e garantías de Anova así o determinase.
