Arranca unha campaña nas parroquias para mellorar a reciclaxe dos residuos domésticos

A empresa Urbaser e o Concello desenvolverán un programa de charlas nas parroquias co obxectivo de mellorar a correcta clasificación dos residuos domésticos que xeran os fogares e o seu posterior depósito nos colectores específicos. O obxectivo da campaña, que arranca este xoves en Saxamonde, é “facilitar a súa posterior reciclaxe, protexer o medio ambiente e non incrementar o custo do tratamento dos residuos do Concello”.

Uns obxectivos que o Concelleiro de medio ambiente, Miguel Angel Alvarez Ballesteros, considera prioritarios de cara a diminuír os custes que para os veciños lles supón a recollida do lixo xa que “canto menos se recicle máis hai que pagar a Sogama polo tratamento dos residuos”. E malia que os redondeláns se atopan entre os que máis plásticos reciclan, aínda queda moito por facer para evitar que cascallos ou restos de poda e xardinería acaben no colector verde ou que todo o que depositemos no colector de papel sexa susceptible de se reciclar. Para corrixir erros ou malos usos, as charlas que van percorrer as parroquias terán un carácter eminentemente práctico con consellos encamiñados a facilitar que cada material acabe no colector axeitado. Incidirase tamén na reutilización e na elaboración de compostaxe doméstico cunha nova técnica coñecida como verme-compostaxe. Farase tamén fincapé na necesidade de reciclar o aceite usado en cociña co obxectivo de acabar coa costume de tirar este aceite de uso doméstico polo vertedoiro. A primeira das charlas será este xoves ás 20:00 horas no Centro Cultural Chan das Pipas en Saxamonde. E o venres 21, as 19.00 horas, no Círculo Cultural e Recreativo de Cesantes.