Arturo González: “Non hai prórroga no pavillón, nós imos cumprir os prazos”

O PP non contempla atrasos e afirma que o pavillón estará listo o 15 de marzo. Así o confirmou o concelleiro de urbanismo nun pleno extraordinario de urxencia celebrado onte para aprobar unha modificación técnica que afecta á fachada do novo pavillón de A Marisma. Unha sesión practicamente de trámite pero que serviu para que o populares confirmasen a súa intención de cumprir os prazos e que a obra estea lista en dez días malia ás dúbidas amosadas polos grupos da oposición.

González aseguraba que o goberno local non manexa outro escenario que non sexa cumprir os prazos establecidos por Europa e que a obra este rematada en 10 días. Un requisito imprescindible para poder así acceder a esa importantes achega económica que permite financiar un pavillón que conta cun orzamento de 1,8 millóns de euros. O edificio constrúese contrarreloxo xa que por tratarse dunha obra enmarcada dentro do plan Marisma Máis os prazos son establecidos por Europa e debería estar listo o vindeiro 15 de marzo. Iso si, González engadía que “de non cumprírense os prazos será nese momento cando haxa que analizar de quen é a responsabilidade”. Malia que a modificación aprobada onte non suporá ningún custe para as arcas municipais e afecta a un cambio de material no exterior de edificio en resposta a unha  solicitude da adxudicataria da obra, a empresa Dragados, o acordo non foi unánime. Tan só o BNG lle deu o seu apoio aos populares. Un voto a favor que non estivo exento de críticas xa que segundo explicou a voceira dos nacionalistas, Cecilia Pérez Orge, “lles damos o noso apoio por unha cuestión de responsabilidade, malia entender que o PP está a actuar con moita improvisación”. Precisamente os atrasos á hora de trasladar aos grupos da oposición o expediente desta modificación no proxecto foi o que levou a Agrupación de Electores a votar en contra. Explicaba Alfonso Blanco que non podían votar a favor dun expediente “que non tivemos tempo de ler, non podemos fiarnos da palabra do goberno”. Os socialistas optaron pola abstención e manifestaron as súas dúbidas de que o proxecto estea rematado no prazo de 10 días. Luís Orge ademais de manifestar ese temor aproveitaba a súa intervención para criticar un proxecto “no que se non se contempla para o pavillón cuestións básicas como a calefacción ou as tomas de corrente”.