O equipo de Jacobo Montes ten máis preto a clasificación para o play off de ascenso. Os redondeláns puideron deixar o pase case sentenciado, pero acabaron cedendo un empate. Unha vitoria ante Deportivo B ou Ribadumia outorgaríalles a clasificación matemática.
Terceira División
Ribadeo 1-1 Choco
O Choco aproveitou os primeiros minutos dubitativos dos locais para facer o primeiro tanto do partido, obra de Félix nunha xogada na que aproveitou unha contra para bater a Javi Liz, xa no ecuador da primeira parte. Co resultado en contra, os lucenses empezaron a apertar, aínda que non foron capaces de culminar ningunha das ocasións das que dispuxeron e o encontro chegou ao tempo de descanso con vantaxe para os de Montes. Na segunda parte cambiaron as tornas cando, no minuto 55 empatou o Ribadeo cun tanto de Rafa Casanova despois dunha falta que lanza Cortegoso. Coa igualada no marcador, o colexiado expulsou a Saúl, o que obrigou a un esforzo extra dos redondeláns que, malia estar cun menos, dispuxeron de opcións para poderse levar os tres puntos do Pepe Barreira. Pero tamén o Ribadeo tivo ocasións para facerse cos tres puntos. Polo tanto, un empate para festexar e que deixa boas sensacións. E é que o Choco mantén catro puntos de colchón sobre a quinta posición que comparten Bergantiños e Ribadeo a falta de dous partidos. Unha vitoria ante o Deportivo B ou o Ribadumia outorgaría a clasificación matemática para a promoción de ascenso ao equipo de Redondela. Unha fazaña para un dos conxuntos máis modestos da categoría e que agora está a un paso do milagre. Na próxima xornada, o Ribadeo visitará ao Rápido de Bouzas e o Choco recibirá en Santa Mariña ao Deportivo B. Os coruñeses son segundos, praza que teñen asegurada ao avantaxar en 7 puntos ao Cerceda, o terceiro clasificado.
Ribadeo FC: Javi Liz, Fernando (Jacob, min.88), Isma (Miguel, min.65), Koki, Álex, Dapo, Rafa Casanova, Javicho, Criss (Adrián, min.80), Santi, David Rodríguez
CD Choco: Cortegoso, Pablo Piñeiro, Saúl, Lucas, Carminati, Muíños, Gonza, Fernando, Félix (Cris, min.70), Hugo (Ricard, min.89), Silva (Róber, min.65)
Goles: 0-1, min 21: Félix; 1-1, min 55: Rafa Casanova.
Árbitro: Javier González Arevalo. Amoestou a Rafa Casanova polo Ribadeo e a Muíños e Hugo polo CD Choco e expulsou con dobre cartón a Saúl do Choco no minuto 75.
Segunda Autonómica
Choco B 4-1 Vilariño
O filial do Choco lidera o seu grupo logo de golear ao Vilariño, e grazas ao tropezo do Nigrán no campo de A Guía. A tres xornadas de que remate o campionato os redondeláns están en cabeza, un punto por riba do Nigrán, que será precisamente, o seu próximo rival.
Arcade descansou, na próxima xornada xoga no campo do S. Martín, da parte alta da táboa.
Terceira Autonómica
Chapela 0-0 Miño
O Chapela mantén a segunda praza logo do empate co Miño, na próxima xornada recibe ao Santa Eulalia, da metade da táboa
Moledo 3-1 Peña Beretes
O Peña Beretes segue na parte baixa da táboa, na próxima xornada xoga no campo do Mosende, quinto clasificado.
Atl Vilar 1-3 San Juan
A derrota deixa ao Vilar na quinta praza, a próxima fin de semana xoga no campo do Caselas B, que é sexto.
Cesantes descansou, próxima xornada visitan o campo do At. Estación, quintos do grupo.
