Os monicreques invaden Redondela

Un total de 26 compañías ofrecerán máis de 80 representacións durante sete días na XVII edición do Festival Internacional de Títeres Memorial Juanjo Amoedo. Na cita, que comeza o luns, grupos locais como Tanxarina misturaranse con artistas chegados desde Francia, Holanda ou a República Checa. Haberá representacións para todos os públicos nas rúas e prazas, e tamén no auditorio da Xunqueira, aos que se suma a mostra “Un festival de portada” e unha “ruada participativa” desde a Fonte do Mouro.

O director do festival, Luis Crespo, salienta que esta edición do festival internacional ten tamén un marcado acento redondelán, co concerto de Tatán que inaugura as actividades na noite de luns, e a presenza no cartel da agruapación local Tanxarina. A eles súmase a compañía Baobab, na que participa a redondelá Andrea Bayer, que inclúe nos seus espectáculos lembranzas da súa infancia. O alcalde redondelán, Javier Bas, reivindica o festival como un “sinal de identidade” de Redondela, onde a participación da sociedade é “fundamental”, e salienta o bo traballo da dirección do certame e do colectivo Xente Titiriteira. Haberá moita presenza de artistas galegos, e tamén agrupacións de comunidades como Cantabria, Aragón, Cataluña e Canarias. A presenza internacional chega dese Francia, Portugal, Holanda, Dinamarca e a República Checa. O Festival arrancará o día 16 cun concerto inaugural a cargo de Tatán e o seu Chapeu, e que terá lugar ás 23:00h na Casa da Torre. O 17 de maio celebrarase o Día das Letras Galegas cunha completa programación de rúa e sala cunha forte presenza de compañías galegas e redondelás. Nesta xornada, Tanxarina escenificará o seu aclamado Titiricircus, e Títeres Cascanueces porá en escena Barriga Verde e o Muíño da Néboa. Tamén se contará con compañías estatais, como os canarios de Títeres Pepeluna e o seu Ratónperez, e con compañías internacionais, como os holandeses Electric Circus e o seu itinerante Mono the Monkey ou os checos Teatro Konmo e O conto do vello lobo. Outra das compañías con participación redondelá, Baobab Teatro, ofrecerá no Multiúsos da Xunqueira ás 17:00h o seu espectáculo Luppo, que recibiu o Premio ao Mellor Espectáculo Infantil na Feira de Teatro de Ciudad Rodrigo. Ás 21:00h, no mesmo espazo, a compañía galega Cinema Sticado representará Mirlo & Rula, que emprega as novas tecnoloxías para facer cine ao vivo co monicreques. No eido musical, a Fanfarria Taquikardia percorrerá as rúas coa súa música e o grupo De Vacas ofrecerá un concerto ás 20:00 na Casa da Torre, no que interpretan en galego as súas particulares versións de cantantes como Michel Teló ou as Spice Girls. Ademais os máis pequenos poderanse achegar á Pista da Xunqueira para xogar cos brinquedos da Casa dos Xogos. A programación complétase coa ruada participativa A Fonte do Mouro. Bebedoiro das Bestas, os xa tradicionais Títeres pola Gorra, a exposición Un Festival de Portada e a pancarta colaborativa para deixar unha mensaxe á compañía Títeres desde Abajo. Desde a organización do Festival Internacional de Títeres quixeron saír ao paso das críticas do PsdeG por eliminar a programación escolar do Auditorio do Piñeiral do Crego de Chapela. O grupo municipal socialista denunciou que o cambio supón “que moitos centros educativos públicos non poidan acudir ás sesións escolares en Redondela polo custe do transporte”. Crespo explica que tomaron a decisión para concentrar a programación no local “con maior aforo”, que é o da Xunqueira, para que poida asistir ás funcións “o maior número de espectadores posible”. Engade tamén que se decidiu ampliar o número de funcións na rúa, que son de balde, para que os espectáculos sexan accesibles “a todo o público”. Desde o Concello o alcalde non quixo entrar a valorar as críticas dos socialistas, sinalou que o director do festival ten “total autonomía” para tomar as decisión sobre a organización dos espectáculos, e lamentou as “disputas políticas” nun evento cultural de gran repercusión no que todos deberían “traballar unidos”.