En total foron 20 os maios que competiron este ano no que houbo novidades nesta festa tradicional, xa que o palco no que cantan os cativos desprazouse da praza do Concello a un lateral da Alameda. Unha edición cun alto nivel en canto ás figuras presentadas e que concedeu o primeiro premio ao maio de Chan das Pipas que presentaba un canteiro tallando un cruceiro. O gañador do maio tradicional foi o Cono da Comparsa.
Logo de días recollendo fiuncho e pampullo, a xornada do martes foi a máis intensa en canto ao traballo para ter rematadas as figuras que neste festivo do 1 de maio se puideron ver na Alameda de Redondela. De feito, centos de persoas aproveitaron o bo tempo para achegarse a este espazo e observar esas figuras que nesta edición presentaron un alto nivel, con esculturas vexetais de gran tamaño e moitas delas cunha meticulosa elaboración.
Ese foi o caso do maio gañador, un canteiro tallando un cruceiro presentado polos integrantes do Canteiriño Desafiuzado de Chan das Pipas. Tamén moi traballada a propostas dos da taza da Tinta de Reboreda que presentaban unha escena dun furancho que se fixo co segundo premio. Orixinal e galardoado tamén o Maio Castrexo chegado dende Cedeira que logrou o terceiro premio nesta categoría.
Pola súa banda o gañador en maio tradicional foi O Cono da Comparsa, seguido de O Carballo e os Fiunchiños.
No apartado de coplas impuxéronse Os Trasnos de Quintela, seguido de Bolboreta e Os Tirabeques. Xa na categoría de interpretación fixéronse con premios os integrantes de O Carballo, seguido de Os da Taza Tinta e os Ventoliños.
