A Asociación ARPE (Asociación Rande patrimonio Europeo) celebra este venres ás 20:00 horas no Meirande unha reunión aberta para darse a coñecer e buscar apoios, contribucións e ideas para lograr o seu obxectivo: un Selo de Patrimonio Europeo para o conxunto patrimonial que existe no litoral do estreito de Rande. Un conxunto que abarca os elementos visibles neste espazo como o cargadoiro de Cotto Wagner, o cargadoiro de mineral ou os restos da fortaleza, pero tamén outros tesouros agochados, como os barcos afundidos no estreito de Rande “un dos maiores xacementos de pecios subacuáticos do mundo”.
A adquisición deste “Selo de Patrimonio Europeo” para o Estreito de Rande e os seus terreos próximos serviría, segundo explica un dos seu promotores, o arqueólogo Xurxo Constenla, “como un medio de promover e preservar os bens culturais, os monumentos, os enclaves naturais ou urbanos, incluíndo calquera patrimonio inmaterial, tanxible e intanxible, contemporáneo e tradicional, e os lugares que desempeñan unha función esencial á hora de comprender a memoria e a historia europea”. Quedaría así protexidos espazos emblemáticos como a fortaleza de Rande, un dos últimos vestixios terrestres asociados coa batalla, o cargadoiro de mineral construídos hai practicamente un século, ou o cargadoiro de Coto Wagner “a última das grandes infraestruturas construídas en Rande, un gran cargadoiro de ferro con cintas transportadoras, construído entre 1960 e 1965 e pechado nos anos 70 coa crise enerxética mundial”. Pero tamén serviría para poñer en valor a “riqueza invisible” dese espazo, os 25 galeóns afundidos no estreito e que supoñen “un dos maiores xacementos de pecios subacuáticos do mundo”. Un Selo de Calidade que outorgaría a este espazo unha maior protección ante calquera tipo de ataque. Neste sentido apuntan como unha acción a curto prazo reunirse coa Autoridade Portuaria para coñecer cales son os seus plans para esta zona.
Explica os motivos de confromar esta asociación
Reunirse cos seus responsables para coñecer as súas instencións