Por segunda xornada consecutiva o C.D. Choco asinou un empate ante o U.D. Ourense ao anotar no tempo engadido. O Arcade impúxose a domicilio ao Alertanavia e empataron os seus respectivos partidos Chapela e Atl. Vilar. En fútbol sala gañaron Pazos e Campito, e empatou o Redondela Maramar. No balonmán local pleno de vitorias con importantes triunfos de SAR Rodavigo, Rodosa Chapela e SAR Plastic Omnium.
Terceira División
C.D. Choco 1-1 U.D. Ourense
Duelo igualado e moi disputado o vivido onte en Santa Mariña. Os de “Gonza” sufriron ante as ausencias de homes determinantes como Félix e Davicín, ambos os lesionados. E a afección choqueira tivo que agardar ao tempo de desconto para ver o gol de Alberto Suárez logo de ir por detrás no marcador desde o minuto 42. O mediocentro defensivo deixou no fondo da rede o esférico nun pase atrás de Caloi logo dunha gran xogada de triangulación con Yerai Couñago e Comis. O empate, terceiro consecutivo, neste caso sabe a triunfo e supón unha inxección de moral. O Choco, no 8º posto, xogará o domingo no campo do Estradense, 9º clasificado a tres puntos de distancia.
Choco: Cortegoso; Mario, Vitra, Yago, Aitor Cañedo (Tomás Abelleira, min. 64); Alberto Suárez, Caloi; Yerai, Sergio Santos (Comis, min. 55), Martín (Edu, min. 76); e Adrián Rodríguez.
UD Ourense: Anxo; Josu, Pablo Corzo, Viti (Germán, min, 77), Alfredo; Rubén Arce, Tiago, Rubén Durán; Champi, Marcos (Pedrosa, min. 70), Isi (Carlos, min. 64).
Goles: 0-1, min. 42: Tiago; 1-1, min. 91: Alberto Suárez.
Primeira Galega
Alertanavia 0-2 Arcade
O Arcade dominou por completo, e na segunda parte materializarían a súa superioridade con dous goles para facerse con tres merecidos puntos. Os tres puntos serven aos de Soutomaior para escalar varias posicións, son agora 8º. O domingo reciben ao C. Lameiro, da metade baixa da táboa.
Segunda Galega
Cesantes 1-2 Romay
O Cesantes segue como pechacancelas do grupo, e vai ter difícil recuperar posicións. O domingo visita o campo do Vilaboa, 3º do grupo.
Mos 2-2 Atl Vilar
Os de Vilar consiguen un importante empate no campo do Mos, pero precisan seguir sumando para garantir a permanencia. O domingo reciben en San Martiño ao Gondomar.
Terceira Galicia
Balaídos 2-2 Chapela
O Chapela adiantouse de penalti e os locais igualaron tamén desde o once metros, adiantándose na seguinte xogada para marchar con vantaxe ao descanso. Con todo, ao pouco de renovarse o encontro, Yago Crespo conseguía devolver o empate para o Chapela que sería xa definitivo. Un punto que afasta ao Chapela da pelexa polo fase de ascenso. O domingo teñen xornada de descanso.
Nespereira 0-6 Coia B
Un Coia B moi superior, claro favoritos ao ascenso, goleou ao Nespereira, que este domingo xogará no campo do Moledo, pechacancelas do grupo.
Futbol Feminino 1ª Liga Galega
Arcadia 2-5 UD Mos
O UD Mos, líder da liga, fixo valer o seu papel de invicto e foi superior ao Arcadia no partido disputado no Salgueirón. O domingo xogan no campo do Val, 11º na táboa.
Fútbol Sala
Terceira División
Pazos de Borbén F.S 6-5 Valdesuso Vilalba
Importantísima vitoria dos de Fran Amoedo, que suma así a sexta consecutiva. Partido non exento de polémica, con moita emoción e goles, no que os de Pazos se impuxeron a un Vilalba FS que chegaba como líder. Os locais sumaron os goles de Joni (4) , Pablo (1) e Eloy (1) e tamén o apoio dunha afección incondicional que os arroupou no pavillón municipal. O Pazos, quue é 9º, xoga esta fin de semana na pista do Bueu, que é 10º, pero xa a 5 puntos de distancia.
Preferente Sur
Redondela Maramar 3-3 Celado Mos
Reparto de puntos que deixa aos redondeláns no 5º posto da táboa. Esta fin de semana volven xogar como locais, reciben ao Coles, pechacancelas do grupo.
Coles 1-3 Campito
Os de Chapela foron superiores na súa visita á pista do colista. A vitoria permítelles escalar unha posición, son 6º, e esta fin de semana disputan o derbi no pavillón do Teis. Os vigueses atravesan unha situación complicada, son 15º, en postos de descenso.
Primeira Galicia
Marín Ponfincas 5-2 Arealonga Const.Castro
Revés para os de Chapela que poñen fin a unha longa xeira de vitorias. Con todo, manteñen o liderato, que defenderán esta fin de semana na casa ante o Pecheches (5º).
Balonmán División de Honra Prata Feminina
Lavadores 27-29 SAR Rodavigo
As de “Chini” seguen coa racha positiva de resultados, logo de impoñerse ás viguesas nun partido moi dusputado e superalas na táboa. Esta fin de semana a SAR repite como visitante cun desprazamento máis longo. Mídense ao Xixón, da parte baixa da táboa.
Primeira Nacional
Rodosa Chapela 27-22 Ampate Lanzarote
O Chapela fixo un grna partido e superou a un dos seus rivais directo na loita pola fase de ascenso. O conxunto redondelán, nunha gran segunda metade, gañou por cinco goles e logrou ademais o “gol-average” particular. O Chapela é 3º, e a próxima fin de semana repite como local, recibe ao Lalin, o lider do grupo que está a só 2 puntos.
Primeira Autonómica
SAR Plastic Omnium 30-17 Rasoeiro
O conxunto redondelán defendeu o liderado sen problemas ante o equipo grovense, e foi moi superior durante todo o encontro. Esta fin de semana xoga na pista do Poio, 5º do grupo.
