A Alameda Rosalía de Castro de Chapela acolle na noite do venres un concerto que promete poñer a todo o público a bailar e dar palmas. A formación “Pa ti na ma” porá a música con ritmos flamencos, rumba e “moita gaña de festa”, como sinala o seu vocalista Fran Vázquez. Son unha das poucas formacións que se dedican en Galicia a este estilo musical que no norte “tamén gusta moito”.
Logo de dous anos de pandemia hai máis gañas de festa ca nunca, e o concerto de Chapela será un excelente aperitivo para o Entroido de Verán que se celebrará o sábado en Redondela. A cita con “Pa ti na ma” será ás 21.30 horas, con entrada de balde dentro da programación cultural do Concello de Redondela.
