A iniciativa leva por nome “Os tesouros de Redondela” e parte do Servizo de Normalización Lingüística co obxectivo de documentar a historia das parroquias de Redondela a través dos testemuños das persoas de maior idade. O primeiro dos documentais, baixo a dirección de Fernando Carreira “Cuchi” está centrado na parroquia do Viso e presentarase este sábado ás 19:00 horas no Multiúsos da Xunqueira.
Un total de 13 homes e mulleres do Viso, contactados a través da Sociedade Cultural da parroquia son os encargados de relatar ante a cámara as súas vivencias de cando eran mozos. Rememoran así como tiñan que ir lavar a roupa ao río, desprazarse á fonte para poder ter auga ou mesmo ir a cada dun veciño cando querían facer unha chamada de teléfono cando este obxecto estaba tan só ao alcance duns poucos.
Falan tamén de cómo mudaron as festas e romarías e lembran as formas de se divertir cando eran novos. Así o recolleu coa súa cámara Cuchi Carreira, encargado tamén da montaxe, onde en forma de documental se inclúen tamén vistas do territorio e imaxes antigas.
Unha primeira entrega que confía teña continuidade xa que a idea do Concello en principio sería facer unha serie documental que permita recoller testemuños en todas as parroquias “para que non se perdan e para que cada un dos capítulos sexan difundidos tamén nos centros educativos ou dende outros ámbitos”.
O primeiro dos documentais poderá verse este sábado ás 19:00 horas no auditorio da Xunqueira e chegará precedido da actuacións das pandereteiras Terra Meiga. A entrada é de balde pero compre retirar as invitacións previamente na tenda de Concha no Viso ou no propio Multiúsos.
