Cans expertos en distintas materias pasaron pola escola infantil de Cesantes para amosar a labor que desenvolven na Unidade de Guías Caninos da Policía Nacional. A exhibición contou con Yango, un pastor alemán especializado na procura de armas e explosivos, “Galia”, pastor belga malinois, cuxa tarefa principal consiste en buscar billetes e “Flecha”, un braco experto en drogas e explosivos.
A unidade de Guías Caninos foi creada en 1945, con sedes en distintas cidades españolas, entre elas na Coruña, destacando entre as súas tarefas a procura e rescate de persoas e restos humanos, localización de explosivos, drogas, detección de billetes de curso legal, acelerantes do lume, acompañamento e defensa.
Os pequenos puideron gozar da presenza dos cans, moi atentos ás explicacións dos policías sobre o proceso de adestramento, respondendo as curiosidades destes nenos, que se mostraron en todo momento expectantes e moi atentos, a pesar da súa curta idade.
Os aplausos dos pequenos e as súas educadoras foron no momento que estes cans policías comezaron a mostrar o seu traballo, en concreto “Galia”, un pastor belga dun ano que se encargou de buscar billetes que previamente se esconderon no patio do colexio, recibindo por cada acerto a súa recompensa e un forte aplauso de todos os nenos.
