Música, obradoiros e espectáculos encherán a Carballeira do Peirao de Arcade na próxima fin de semana, os días 26 e 27 de agosto. Un festival para xente miúda organizado polo Concello de Soutomaior e que busca ser un referente para toda a rapazada da comarca. O alcalde, Manu Lourenzo, sinala que “tanto os máis pequenos e pequenas como pais e nais poderán desfrutar de concertos infantís, espectáculos de maxia, contacontos, obradoiros e moito máis”.
O evento comezará o sábado 26 ás 11.15 horas coas Coruxeiras, dúas artistas locais que presentan a súa última creación musical. Ás 11.30 horas será a quenda do mago Martín Camiña, que chega a Soutomaior co seu espectáculo “Ilusións sen azucre industrial”. Xa ás 13 horas a cativada desfrutará do espectáculo “Ritmando”, a cargo de @s Jaloch@s. Pola tarde haberá un segundo pase das Coruxeiras ás 16.00 e ás 16.30 horas comezará o obradoiro de “Bolas de lá natural de ovella’. Ás 17.30 horas será a quenda do espectáculo de clown e escapismo “A vida tola”, de Natalia “Pajarito”. Xa ás 18.30 horas haberá un segundo obradoiro, “Somos punkis”, centrado en experimentar coa estética e coa imaxe “sen vergoña e sen medo”. Ás 20.00 horas comezará o concerto de Peter Punk e Brais das Hortas. A primeira xornada da Punkativada rematará co peche das Actividades de Verán, que comezará ás 21.00 horas.
O festival retómase o domingo ás 12 horas co espectáculo musical e de contacontos “A Ramona Pequena vai á lúa”, de Pakolas. Pola tarde os rapaces poderán participar no obradoiro “Bonecos de pau”, que comezará ás 17.00 horas. O home orquestra Pulpiño Viascón será o encargado de pechar o festival ás 18.30 horas co seu concerto “Dallecopé”.
A maiores, durante todo o festival estará habilitado o espazo Cacharrada Musical, no que a rapazada poderá facer música e ritmos con todo tipo de obxectos cotiáns. Música e diversión en galego como xeito de reivindicar tamén a cultura e a lingua do país, un dos obxectivos tamén deste festival “ante a perda de falantes tan alarmante que ten o galego entre a sociedade, e nomeadamente entre os máis cativos, e desde as administracións temos que poñer as ferramentas para frealo”, sinala Lourenzo.
Tamén haberá espazo gastronómico para que as familias poidan gozar da fin de semana “nunha das contornas naturais máis fermosas do fondo da ría de Vigo”. Desde o Concello de Soutomaior confían en que a iniciativa sexa “un éxito” xa que se trata dun certame de gan calidade que pretende consolidarse e converterse “nun referente dos festivais infantís en Galicia”.
