O quecemento global provocado polo cambio climático é xa unha realidade en todo o planeta, e Galicia non é unha excepción. O aumento da temperatura non se rexistra só no aire, senón tamén na auga. Isto repercute nas especies que viven nas nosas rías e prexudican o marisqueo que desde hai xa anos presenta unha maior mortaldade nos bivalvos. Moitas especies de peixe están a desprazarse tamén cara ao norte buscando augas máis frías, segundo explica Antón Lois, de Amigas da Terra
Os efectos nocivos do cambio climático están a padecelos especialmente no sector primario, tanto na pesca e no marisqueo como tamén os agricultores e gandeiros. A situación afecta a moitos sectores produtivos nas rías galegas. É o caso das mariscadoras e tamén dos produtores de mexillón, que ven como cada ano que pasa os episodios de mareas vermellas con máis frecuentes e prolongados. Trátase da floración de algas nocivas que obrigan a pechar os polígonos de bateas e bancos marisqueiros xa que os bivalvos non son aptos para o consumo.
No caso concreto do litoral de Redondela, especialmente na enseada de San Simón, os prexuizos polo cambio climático son aínda máis intensos. A escaseza de precipitacións e o escaso calado do mar neste fondo de ría está a converter á enseada nunha salina “semellante á que houbo no seu tempo en Vilaboa”.
Ademais do cambio climático, tamén a contaminación e as especies invasoras son factores que fan mermar o marisco nas rías galegas. A universidade de Vigo leva desde 2014 analizando estes problemas. Teñen comprobado que a baixa salinidade do mar e o quecemento da area que provocan as choivas torrenciais e as vagas de calor caudan unha elevada mortaldade nos bivalvos, e ademais os que sobreviven teñen menor capacidade para reproducirse. Esta situación provoca graves problemas económicos nun sector do que viven centos de familias na nosa bisbarra.
