Ao redor dun cento de persoas déronse cita ás portas do Multiusos da Xunqueira na tarde de hoxe para amosar a súa discoformidade cun Plan Xeral que aseguran “esquécese das parroquias” impedindo o seu desenvolvemento, reducindo ao mínimo as posibilidades de crecemento residencial e inclinándose por un modelo territorial que entende que Redondela está formado por tres grandes nucleos (Chapela, centro urbano de Redondela e Cesantes) relegando o resto do territorio.
Representantes da Asociación de veciños de Cedeira, O Viso, Vilar, Quintela, a Asociación cultural Alén Nós ou a Plataforma en defensa da Enseada de San Simón son algúns dos colectivos que secundaron unha protesta da que se descolgou a Asociación de Veciños de Chapela por entender que o obxectivo da mesma era tombar un plan moi necesario para Redondela.
Negaban esta afirmación os convocantes quen insisten en que o motivo da concentración era facerse escoitar e amosar a súa disconformidade cun Plan Xeral que non tivo en conta ás parroquias e que supón perder “unha gran oportunidade que defina que se pretende que sexa Redondela”.
Aseguran neste sentido que os redactores do Plan non coñecen o territorio “feito que queda máis que patente cando se observa que os límites parroquiais recollidos no mesmo non se corresponden coa realidade”.
Unha das cuestión máis criticadas é que non se dote ás parroquias de solo edificable o que se traduce nun aumento considerable da especulación o que obrigará a veciñanza a marchar cara outros concellos “que si apostan pola posta no mercado de máis solo edificable que o noso”.
Explicaba por exemplo o caso de Cedeira “hai muito solo rústico que ten todos os servizos e infraestruturas co cal podería integrarse perfectamente o seu crecemento residencial”.
Tamén os veciños de Vilar asistían a este protesta recalcando a complicada situación da parroquia afectada principalmente polo aeroporto así como por outras infraestruturas e cuxa situación pode empeorar ao incluirse no plan tres micropolígonos.
Insisten os manifestantes en que un dos grandes problemas deste plan xeral é que parte de datos erróneos: unha cartografía desfasada, non aparecen as traídas de augas o que pode facer variar a cualificación dun solo entre Urbano ou non urbano e un descoñecemento xeral da territorio e a idiosincrasia das súas parroquias.
Insisten en que o pleno non debía ter aprobado inicialmente esta Plan “que levaba no caixón varios anos e que non se actualizou” e no que falta tamén protección específica para espazos naturais como poida ser a Enseada de San Simón “na documentación do Plan non se presenta a avaliación de repercusións na Rede Natura 2000”.
En relación ao patrimonio cultural do municipio subliñan que “se detecta a falta de inclusión no catálogo de máis de 300 elementos susceptibles de ser catalogados polo Plan con maior ou menor grao de protección”. feito que puxeron de manifesto dende o colectivo Alén Nós.
Finalmente os colectivos insisten en que a protesta non ía contra ningún partido político “estamos en contra de que non nos quixeron escoitar en todo este tempo”.
