O proxecto, segundo lle trasladou o subdelegado do goberno Abel Losada aos afectados de Chapela, será sometido “pronto” a licitación pública malia que non especificou prazos. Unha actuación que suporá un investimento de 11 millóns de euros e que busca minimizar o ruído que padecen os veciños que residen ás beiras da AP-9. A actuación pertence a un proxecto que engloba dende Santa Cristina de Cobres (Vilaboa) ao límite con Vigo.
Losada reuniuse na xornada de onte coa Plataforma de Afectados da AP-9 en Chapela co obxecto de explicarlles as características das pantallas acústicas que se van instalar na parroquia e que irán cimentadas a base de micropilotes para dar a rixidez necesaria para soportar o “efecto vela”. Engadiu que estas pantallas serán “estruturas transparentes e deseñadas cos máximos criterios de integración estética e paisaxística” e que o proxecto será sometido pronto a licitación sen especificar prazos.
Na xuntanza participaron tamén a alcaldesa, Digna Rivas, o concelleiro de urbanismo. Antonio Cabaleiro, o xefe provincial da Demarcación de Estradas do Estado, Pablo Domínguez e técnicos da concesionaria da AP-9, Audasa.
O obxecto desta actuación é a mellora da calidade acústica en áreas moi poboadas da contorna deste tramo da autoestrada afectadas polas obras de ampliación do terceiro carril, en particular en Chapela.
