A Plataforma pola mellora da EP-2702 tampouco descansa este mes de agosto. Hoxe luns ás 19:00 horas teñen previsto cortar a N-550 entre Redondela e O Porriño a altura dos Valos para reivindicar unha vez máis o arranxo da estrada que comunica este punto con Amoedo. Reclaman tamén que se repoñan as sinais que establecían a prohibición do paso de camións de gran tonelaxe por unha vía “estreita, sen pintar, con fochancas e se beiravías que é un perigo constante para os seus usuarios”.
José García, integrante da plataforma, lamenta os prexuizos que poidan causar coas súas mobilizacións pero insisten en que esta é a única alternativa que lles queda ante o silencio da Deputación “que segue sen recibirnos” polo que non descartan protagonizar unha acampada ante este organismo en Pontevedra.
Estiman que son uns 40 trailers os que circulan diarimente por unha estrada na que “en moitos tramos non pasan dous vehículos”. Con todo o máis grave é que a estrada ten limitado o paso de camións pesados “pero no seu día, cando Redondela decretou a prohibición de que este vehículos cruzase polo centro da vila, arrancaron as sinais e malia que estamos solicitando a súa reposición dende a Deputación non atenden a esta demanda que está a poñer en risco a seguridade a veciñanza e dos propios condutores”.
A día de hoxe o proxecto de arranxo continúa sen avanzar. Aseguran que no documento enviado pola deputación ao Concello hai un erro que impide que o goberno local de Pazos avance neste primeira fase.
Aínda así ese proxecto inclúe tan só un tramo dos oito kilómetos de toda a vía “unha actuación que non solucionaría o problema da estrada, polo que reclamamos que se acometa a obra de ampliación na totalidade da estrada.
A mobilización de hoxe será ás 19:00 horas na N-550 no alto dos Valos. Cortarase o tráfico durante 15 minutos nos dous carrís da marcha e durante unha hora e corenta minutos máis exclusivamente un carril.
