A escultura, que apareceu esnaquizada na mañá de onte luns, foi restaurada en menos de 24 horas. A peza, cuxo nome é ‘O camiño das estrelas’, atópase ao remate do paseo marítimo de Arcade, ao carón da ponte romana de Ponte Sampaio.
Este luns ao mediodía foron varios os veciños e veciñas que notificaron que a escultura aparecera cercenada da súa base e tirada ao carón. Nese momento, dende o goberno local iniciouse o proceso de restauración, que rematou na propia tarde do luns cando a escultura recuperouse a súa imaxe orixinal.
Foi o pasado mes de abril cando se presentou esta obra ante a veciñanza de Soutomaior, nun acto no que tamén se proxectou un documental sobre a vida e obra de Bernardo Seoane, realizado polo documentalista Breikus. O escultor faleceu un tempo despois froito dunha enfermidade que levaba tempo aqueixando, pero a súa escultura quedou para sempre no paseo marítimo de Arcade como lembranza do inmenso amor que Bernardo sentía polo fondo da ría de Vigo e pola arte.
O alcalde Manu Lourenzo amosou a súa indignación ante actuacións que “non son doadas de entender”, en relación a este acto vandálico que sufriu a escultura doada por Bernardo Seoane. Unha vez arranxada a peza, Manu Lourenzo prefiriu quedarse coa fonda pegada que este ilustre veciño deixou no noso concello “non se pode entender o Soutomaior de hoxe sen ter presente a importancia de Bernardo para a nosa cultura popular. Milleiros de veciños e veciñas de Soutomaior e de Ponte Sampaio temos desfrutado coas súas esculturas ao paso pola ponte”.
