Vera Vázquez do TMKiteClub de Cesantes recolleu a prata no campionato de España e o bronce no campionato do Mundo na categoría Sub 19 da modalidade Freestyle dentro do deporte do Kitesurf. Ambas probas celebráronse a comezos de setembro en Cádiz, na cidade de Tarifa, onde se deron cita os mellores riders do mundo durante dúas semanas.
O Campionato de España de Kiteboarding SKL 2024 celebrouse en Tarifa, na praia de Valdevaqueros, que volveu a agasallar unha xornada de kitesurf emocionante cunhas finais de moitísimo nivel nas distintas categorías e que desde Tumbao puideron gozar millerios de asistentes. Alí, Vera Vázquez do TMKiteClub de Cesantes proclamouse subcampioa de España de Kitesurf na categoría Sub19 en freestyle, a pesar de levar a penas un ano adestrando nesta modalidade. Esta é a segunda vez que participa, tendo en conta que o ano anterior presentouse para “probar e pasalo ben”. Durante esta edición xa foi máis preparada e quedou de segunda, superada pola sueca Charlotte Losserand por moi poucos puntos.
Durante o Campionato do Mundo da G.K.A. 2024 junior levado a cabo pola Spain Kiteboarding League tamén en Tarifa, Vera Vázquez recolleu o bronce superando desta vez á sueca Charlotte Losserand que quedou de cuarta. Aos dous primeiros postos do podio subíronse dúas francesas: a gañadora Phoebe Rocher e a subcampioa Ela Nowodzinski.
Non foron poucas as circunstancias adversas as que tiveron que enfrontarse, con ventos fortes que complicaron as competicións, sen embargo o xurado adaptase tamén ás condicións do medio e valora a capacidade de resolución en calquera circunstancia. Condicións de levante con forza extrema nalgúns refachos deixaron patente a versatilidade e profesionalidade de todo os competidores que tomaron parte no evento. Unha experiencia única que Vera Vázquez valora de forma moi positiva, xa que a pesar das condicións adversas conseguiu subir ao podio nas dúas competicións.
A rider de Cesantes móstrase moi contenta, pero cunha “sensación amarga” polos resultados , xa que considera que podería chegar aínda máis lonxe. Unha moza competitiva que se marca como obxectivos de cara ao ano que vén chegar a ser campioa de España e do mundo.
Para lograr estes obxectivos adestra, cando o tempo o permite e sobre todo en verán, na auga e tamén en terra para prepararse fisicamente. O TMKiteclub de Cesantes está en crecemento e é considerado o máis grande de Galicia. “Axúdanme a adestrar Fran, Berto, Iago e Felipe que son tamén deportistas do club con moita experiencia nas costas”, sinala Vera.
O club inaugura a tempada do kitesurf galego coa organización do Campionato Galego de Kite, en colaboración co Concello de Redondela, que se celebra cada ano a finais de maio na Praia de Cesantes. Ademais, tamén celebran o KiteFest Xunta de Galicia que consolida a Cesantes como lugar de referencia do kite nacional. Unha cita organizada polo TMKiteclub e o Concello de Redondela que congrega no mes de xullo a un bo número de afeccionados e curiosos e a case 90 riders de toda España para competir na nosa enseada. Poderemos ver o ano que vén a Vera Vázquez “lucir” o seu bo facer na auga durante estas datas sinaladas no noso municipio.
