O goberno local manterá unha reunión este xoves, 3 de outubro, ás 19:00 horas na Casa do Concello coas persoas propietarias das parcelas da zona da Montesiña na que ten previsto construír un ecoparque empresarial. A esta xuntanza asistirá o arquitecto e urbanista Xabier Rivas Barreiro encargado de redactar o proxecto.
O obxectivo da reunión é explicar á veciñanza afectada este proxecto que busca converter Soutomaior nun potente foco de atracción de empresas, o que a súa vez axudará ao desenvolvemento económico de toda a zona.
Lembran dende o goberno local que o proxecto tamén contempla unha grande zona verde, dotando ao ecoparque dun carácter moderno e traballado con espazos de lecer. Un Ecoparque que está pensado para PEMES vencelladas co sector secundario ou comercial. De tal xeito que non suporá un incremento substancial do tráfico pesado e contribuirá a vertebrar o concello a través dunha zona urbanizada, ben alumeada e cunha superficie comercial dotada de dinamismo económico, vida e mobilidade.
O alcalde Manu Lourenzo, sinalou que “estamos a proxectar unha ampla área comercial e empresarial que suporá un antes e un despois para a vida en Soutomaior, trátase duna área empresarial rodeada de zonas verdes e instalacións deportivas que está chamada a ser un núcleo de progreso e de desenvolvemento económico”.
