Espaço Vivo é unha sociedade cooperativa galega nada para como un proxecto de economía circular baseado no agro e na cultura do noso país. Ten como obxectivo promover unha mestura entre a agricultura, as artes e a gastronomía vegana.
Contan cun centro de produción hortícola propio e unha pequena sala para o procesado e elaboración dos produtos e a súa degustación situado no Camiño do Fixón 64 . Ofrecen menú degustación con reserva previa de mércores a domingo en horario de xantar e cea, aderezado os fines de semana con actuacións en directo. Dende a cooperativa, Serxio Crespo anima á xente a “achegarse e coñecer os produtos de proximidade e tempada e apoiar así as pequenas produtoras locais”, pero tamén a gozar dos concertos “íntimos e especiais” e as exposicións que programan para dar a coñecer a artistas locais e internacionais. Unha iniciativa única en Redondela que levan con agarimo e paixón pola nosa terra. Dispoñen de amplo terreo e espazo de xogos habilitado para as crianzas, así como aseos adaptados.
O primeiro concerto de novembro terá lugar este venres 1 de novembro da man de Wilson Saliwonczyk, “pallador arxentino” que mestura a regueifa coa guitarra e que caracterízase por ter unha mensaxe social reivindicativa dedicada por e para o pobo.
O 10 de novembro contan coa presenza de Luismi Partera (Cádiz) en sesión vermú. Un cantautor gaditano con influencias poéticas que pasan por Lorca ata Silvio Rodriguez e mesmo Vetusta Morla no seu lado máis pop.
Su-Min (Corea-Alemaña) trae o seu proxecto experimental a Espaço Vivo o 16 de novembro, cunha proposta envolvente que non vai a deixar a ninguén indiferente.
Lula Mora son un dúo de indie-folk formado por unha galega e unha canaria e chegarán a Redondela o domingo 24 de novembro pechando a programación de Espaço Vivo para este mes. Sara, cambadesa, e Silvia, tinerfeña, crean música de autor co galego como un dos seus símbolos.
A programación de Espaço Vivo é para público reducido, polo que se precisa de reserva previa cun mínimo de catro horas de antelación no teléfono 622193026 ou no enderezo electrónico artenaleiragz@gmail.com. Ofrecen unha experiencia única na que o público comparte espazo e mesa cos artistas para xerar sinerxías entre distintas culturas e degustar gastronomía ecolóxica feita con agarimo e moita imaxinación.
HORARIO DE MÉRCORES A DOMIGO para xantar ou cear: 13:30 horas a 15:00 horas e 20:00 horas a 22:30 horas.
