A Policía Nacional detivo un veciño de Chapela como presunto autor dun delito de tráfico de drogas, por dedicarse supostamente á distribución de estupefacientes polo miúdo tanto nesta parroquia como na área de Vigo.
Segundo informaron fontes policiais, a investigación comezou por mor de informacións recibidas sobre un home residente en Chapela que se estaría dedicando á venda de drogas a pequenas escala. A policía puido constatar que o sospeitoso realizaba as transaccións desde o seu vehículo.
O home quedaba cos compradores en distintos puntos de Redondela e Vigo, e entregáballes a mercadoría, ás veces haxix e ás veces cocaína, sempre en pequenas doses. O sospeitoso facíao a través do portelo do coche, ou no interior, nun breve lapso de tempo no que o cliente entraba no vehículo.
