Rapaces e rapazas do instituto da parroquia participaron esta semana nunha actividade medioambiental consistente na plantación dun cento de árbores doadas polo Concello nunha parcela de dúas hectáreas na zona forestal en Parada. A actividade de repoboación, dirixida pola empresa medioambiental Tarabelos, pretende poñer en valor este espazo natural e concienciar á rapazada da importancia de respectar e coidar a natureza e crear un gran parque forestal na zona.
Alumnos e alumnas de 3º da ESO da IES Chapela e dos ciclos de Educación Infantil e Farmacia participaron esta semana nunha actividade de educación ambiental. Repartidos en varios grupos, un total de 60 rapaces e rapazas están a repoboar unha parcela de monte da parroquia. Trátase da terceira plantación que se fai nesta zona con preto dun cento de árbores, nun terreo duns 20.000 metros cadrados cedido pola Comunidade de Montes Chapela. A parcela en cuestión, no lugar de Parada, conta cunhas espectaculares vistas panorámicas sobre a ría de Vigo.
Guiados por Álvaro Diego Fuentes, da empresa Tarabelos, a rapazada aproveitou a xornada para coñecer mellor a contorna. O experto sinala que, deste xeito, o alumnado “non só fai unha actividade ambiental e aprende a distinguir árbores, senón tamén pode coñecer mellor e poñer en valor a súa propia parroquia, o monte e os camiños”.
As árbores, doadas polo Concello de Redondela, pertencen a diferente de especies entre as que hai castiñeiros, nogueiras, abeleiras, bidueiros, maceiras, caqui, ameixeiras, cerdeiras, salgueiros, figueiras, etc. Fuentes explica que este espazo transformarase nun “bosque comestible”, e de feito as froiteiras plantadas hai un ano xa produciron as primeiras mazás e ameixas. O obxectivo é crear un gran parque forestal na zona, que conta con espectaculares vistas sobre a ría, cun circuíto de sendeiros.
A alcaldesa de Redondela, Digna Rivas, e os concelleiros das áreas de Sostibilidade, Roberto Villar, Ensino, Iván Valles, e Medio Ambiente, Alberto Álvarez, visitaron esta mañá a plantación xunto aos responsables da Comunidade de Montes de Chapela. Rivas avanzou que a zona vai sinalizarse para dar a coñecer este proxecto, “xa que no futuro será unha gran área de lecer”. Roberto Villar pediu tamén á veciñanza “que respecte este traballo e axude a mantelo, xa que algunhas das árbores plantadas o ano pasado foron roubadas”. O concelleiro de Ensino sinalou que se trata dunha gran iniciativa xa que “de xeito transversal o ensino serve para que coñezan máis a natureza e se impliquen no seu coidado”, conclúe Valles. O presidente da comunidade de Montes, Francisco Puch, afirmou que esta iniciativa “é moi positiva para que o alumnado poida coñecer máis os beneficios que ten o monte comunal como pulmón verde para a parroquia”.
