Un ano máis, os clubs de Patinaxe Bolboreta Redondela e Patinaxe Artística Arealonga celebran os seus tradicionais Festivais de Nadal, que terán lugar este sábado, 21 de decembro, ás 18:30 horas nos pavillóns municipais da Marisma en Redondela e no Pavillón Municipal de Chapela. Estes eventos son unha cita ineludible para as familias e afeccionados ao deporte da patinaxe, que aproveitan a ocasión para gozar dunha xornada de diversión, echibicións e sorpresas.
O Nadal é unha época de actividade para os clubs, que non fan unha pausa nas súas programacións, senón que organizan xuntanzas e exhibicións que lles permiten seguir adestrando mentres fomentan a conexión e o compromiso entre os distintos grupos de patinadores. Neste sentido, o Club Bolboreta Redondela contará coa participación especial do Club Indalo de Vigo e das escolas do CEIP de Reboreda, ademais de contar cunha sorpresiva visita de Papá Noel e Mamá Noel en patíns, que repartirán caramelos entre os asistentes.
Pola súa parte, o Club Arealonga realizará sorteos a través de rifas, nas que se poderán gañar cestas de Nadal cheas de chocolates, produtos e materiais para o colexio, así como equipamento de patinaxe. Tamén se contará cunha visita sorpresa de Papá Noel, que agasallará a todos os presentes con caramelos. O evento en Chapela tamén contará coa participación das escolas de patinaxe do Concello de Pazos de Borbén e do Club de Patinaxe Artístico de Pontecaldelas, que se unirán á celebración desta festa.
A cantina estará aberta en ambos eventos para recadar fondos que apoiarán as actividades e iniciativas de ambos os clubs.
Unha vez rematadas as festas de Nadal e coa partida dos Reis Magos cara Oriente, os clubs arrincarán de novo as competicións.
