Este ciclo de teatro posto en marcha hai once anos pola Asociación cultural e Social da parroquia en colaboración co Concello de Redondela, ten como obxectivo fomentar esta arte escénica e suplir a carencia deste tipo de representacións en Chapela. Todas as funcións son de balde no Multiúsos do Piñeiral do Crego ás 20:00 horas. Logo da actuación este sábado da compañía Teatro Agarimo de Vigo, chegarán Lúa Chea con “RESART, residencia de artistas”; a viguesa Porta Aberta con “Munuwa” e a Asociación Dramatúrxica Pico de Castro con “O Randiña”.
Arranca a oferta cultural do ano en Chapela cunha cita xa tradicional como é o ciclo de teatro afeccionado que promove a Asociación Cultural e social de Chapela e que inclúe catro funcións os sábados días 11, 18 e 25 de xaneiro e o sábado 1 de febreiro.
Abre o ciclo o Grupo de Teatro Agarimo, de Vigo, coa obra “Un funeral para morrer coa risa”. Esta comedia, na que participan unha ducia de actores e actrices, trasládanos ao funeral dun pai de familia. Na xuntanza que fan os seus fillos para repartir a herdanza van descubrir unha sorpresa “para morrer coa risa”.
O sábado día 18 será a quenda do grupo Lúa Chea, de Poio, que representará “RESART, residencia de artistas”. Conta a historia dunha residencia de anciáns que comparten o feito de ter sido artistas. Malia os achaques propios da idade, seguen tendo a ilusión de cantar, bailar, actuar… o que nos ofrece unha comedia ácida sobre o paso do tempo.
“Munuwa”, da compañía viguesa Porta Aberta, chegará ao Piñeiral o 25 de xaneiro. Nesta obra un profesor de mediana idade, Darío, canso da vida rutineira que levaba mantendo coa súa ex-muller, aturando os caprichos do seu fillo adolescente e as burlas do seu mellor amigo, toma a decisión de mudar radicalmente de vida e irse ao outro lado do mundo. Para iso deberá prepararse e introducir nos seus hábitos costumes oceánicas “munúwas”.
A Asociación Dramatúrxica Pico de Castro, de Foz, será a encargada de pechar o ciclo de teatro o sábado 1 de febreiro. Será coa obra “O Randiña”, que recrea as peripecias dun vagabundo, o “Randiña”, no seu afán de evitar que se lle arrebaten o único lugar que considera o seu fogar, un banco de praza. Este singular personaxe fará fronte á indiferenza, o abuso e a marxinación tendo como única arma o seu enxeño.
Todas as funcións se representarán no auditorio do Piñeiral do Crego en Chapela ás 20.00 horas. As entradas son de balde.
