A adestradora redondelá e vicepresidenta da Federación galega de balonmán salienta o bo momento que este deporte está a vivir en Redondela. Mostra disto é o feito de que no recente campionato de España de Seleccións Autonómicas (CESA 2025), celebrado en Cataluña desde o 3 ata o 8 de xaneiro, a Selección Galega contara coa participación de 16 representantes de Redondela en diversas categorías e no corpo técnico. Xogadores e xogadoras achegados dende os tres clubs que funcionan no municipio: a SAR, o balonmán Chapela e as Choqueiras que foron un exemplo do alto nivel deste deporte no municipio.
Un dos resultados máis salientables foi o acadado polo equipo cadete masculino que logrou a medalla de prata tras unha final moi igualada contra Cataluña, que rematou cun axustado 30-29 a favor dos cataláns. Galicia dominou o encontro durante os primeiros 45 minutos, pero pequenos erros no tramo final decidiron o partido. Os xogadores redondeláns Lois Alonso, Óscar González e Nicolás Alonso, do Balonmán Chapela, tiveron un papel clave neste éxito.
O equipo técnico, liderado pola adestradora Carla Abad e a delegada Nerea Bouzón, tamén desempeñou un papel fundamental no rendemento do equipo.
Pero houbo outros moitos logros como os bronces para os infantís masculinos e femininos. Pola súa banda o equipo xuvenil feminino rematou no sexto posto tras un intenso partido contra Madrid, que se decidiu na prórroga.
Salientaba tamén Abad o logro do equipo xuvenil masculino que se proclamou campión da Copa de España tras un torneo impecable ou a medalla de prata do equipo cadete feminino.
Con estes resultados, a Selección Galega reafirma a súa posición como unha das grandes potencias do balonmán autonómico, grazas ao talento e ao esforzo tanto dos xogadores como do equipo técnico.
A participación redondelá volve ser un exemplo do alto nivel deportivo da localidade.