Rivas acusa ao BNG de abandonar á cidadanía progresista co seu “xiro á dereita”   

Asegura a alcaldesa de Redondela, Digna Rivas, que os nacionalistas pretenderon chantaxear ao goberno local “reclamando a compra de ducias de exemplares do xornal Nós” a cambio dun voto favorable no pleno que permitiría sacar adiante cuestións tales como a Axenda Urbana ou o salario do concelleiro Alberto Álvarez. Temas que finalmente non foron aprobados ao votar en contra BNG e PP. Rivas insta ao Bloque a “reflexionar se apoia un goberno progresista ou se segue a bloquealo votando da man do Partido Popular”.

Novo capítulo no desencontro entre o grupo de goberno e o BNG. A decisión dos nacionalistas de dar por pechada calquera negociación co PSOE escenificábase no pleno do xoves cando o voto en contra dos seus concelleiros sumados aos do PP impedían a Rivas sacar adiante as  súas propostas.

Rivas acusa agora aos nacionalistas de tentar “chantaxeala” cando na negociación para tratar de aprobar a Axenda Urbana o Bloque puxo como condición “medidas que nada tiñan que ver con este documento, como a compra de ducias de exemplares do xornal Nós”.

A alcaldesa advirte que “ao votar coa dereita o BNG está a esquecer que Redondela é progresista, tal e como a veciñanza o demostrou nas urnas” e asegura que nin a cidadanía nin o propio electorado do BNG “vai entender este cambio de rumbo dos nacionalistas, que vira á dereita”.

Rexeita ademais as críticas recibidas esta semana por parte do voceiro do BNG, Xoán Carlos González quen ademais de acusala de actuar de forma autoritaria, xustificou a psotura do seu partido “ante o continuo ninguneo de Rivas e o reiterado incumprimento do acordo de investidura por parte do PSOE local”. Neste sentido asegura a alcaldesa que “durante estes anos, nunca lle faltamos o respecto á concelleira e concelleiros do BNG. Nin cando votaron a favor nin en contra, mentres que foron moitos os agravios e descualificacións pola súa banda, algo moi estraño se o que pretenden é unha relación cordial de traballo e cooperación”.

O goberno local entende que esta postura do BNG débese a unha “estratexia electoral” e que este xiro á dereita dos nacionalistas “está a poñer trabas á transformación e o avance de Redondela, o que supón un grave prexuízo para a veciñanza”.

Con todo, conclúe afirmando que mantén “a man tendida” ao Bloque para chegar a acordos en beneficio da cidadanía. A alcaldesa insiste en que seguirá traballando “para unha Redondela progresista, que é a que me apoiou, e seguirei loitando por ese obxectivo”.