A XXIX Olimpiada Informática Española celebrarase entre o 4 e o 6 de abril en A Coruña, un evento que, por primeira vez, terá lugar en Galicia.
David Lago Alonso, estudante do IES Pedro Floriani de Redondela, será o encargado de representar a Galicia nesta competición despois de acadar o primeiro posto na proba autonómica celebrada este fin de semana en Santiago. Artai Asasi Vázquez, do IES do Sar de Santiago, que logrou o segundo posto, tamén participará na fase nacional. Ambos os estudantes foron premiados con 400 e 300 euros, respectivamente.
A competición foi organizada polo Colexio Profesional de Enxeñería Informática de Galicia (CPEIG) en colaboración coas tres universidades galegas e tivo lugar na Escola Técnica Superior de Enxeñaría da USC.
Un total de 18 estudantes de Secundaria, Bacharelato e Formación Profesional de grao medio, procedentes de nove centros educativos de toda Galicia, participaron nesta proba. Entre eles, procedentes de localidades como A Coruña, Vigo, Ribeira, Santiago, Brión, Negreira, Burela, Porriño, Redondela e Vedra.
Outros premiados foron Hugo Domínguez, do CPR Manuel Peleteiro, e Hugo Gorgojo, do IES Perdouro de Burela, que ocuparon o terceiro e cuarto posto, respectivamente. Nicolás Freiría, do IES Ribeira do Louro de Porriño, foi quinto. Ademais, Rocío Pérez-Muñuzurri e Laura Souto, ambas do Peleteiro, foron recoñecidas como mellores alumnas da ESO.
