O departamento de Infraestruturas e Sostibilidade alerta sobre os constantes actos vandálicos contra o mobiliario urbano, especialmente as luminarias da vía pública. Nos últimos días, rexistráronse disparos con escopetas de aire comprimido contra os farois da avenida José Fernández López, en Chapela, unha práctica que xa se repetira en Reboreda e Cedeira. Estes ataques deixan ás rúas sen iluminación ata que se poden substituír as lámpadas, cun custo duns 300 euros cada unha. O concelleiro Roberto Villar lamenta estas accións irresponsables, que afectan tanto á seguridade como ás arcas municipais.
Tamén se están a producir furtos e sabotaxes en infraestruturas de seguridade viaria. Nos últimos meses, desapareceron varandas e conos de sinalización, mentres que en moitos casos as cintas protectoras son deliberadamente retiradas ou desprazadas de lugar, xerando confusión e perigo para condutores e peóns. Ademais, algúns individuos están a repintar de negro as liñas amarelas que prohiben o estacionamento, dificultando a súa visibilidade e incumprindo as normas de tráfico.
Outro episodio preocupante é a retirada de placas metálicas e de poliéster utilizadas para cubrir buracos no pavimento en rúas e beirarrúas. Ao ser desprazadas ou roubadas, deixan ao descuberto fochancas perigosas, aumentando o risco de accidentes. Villar cualifica estas accións de “irresponsables” e fai un chamamento á cidadanía para frear estes ataques ao ben común, lembrando que a sinalización e os elementos de protección existen para garantir a seguridade de todos.
