Expourense foi testemuña este sábado dunha gran xornada de competición no Campionato Galego Sub18 PC, onde os atletas demostraron a súa destreza e determinación. Entre os destacados do evento, sobresae a actuación de Gael Couñago Romasanta, quen se proclamou Campión Galego Sub18 en salto de altura. A súa espectacular marca de 2,00 metros non só lle permitiu revalidar o título, senón que tamén o colocou no primeiro posto do ranking nacional na súa categoría.
Gael mellorou a súa marca personal, pasando de 1,92 metros a 2,00 metros, un logro que reflicte a súa constante progresión e esforzo. O seu éxito foi un dos momentos máis emocionantes da xornada, que deixou a todo Expourense vibrando. Agora, a súa próxima cita será o Campionato de España que se celebrará en Valencia.
Pola súa parte, o velocista Hugo Menéndez Abalo tamén deixou a súa marca, cunha destacada actuación nos 60 metros, onde se clasificou para a final. Hugo mellorou a súa marca personal, pasando de 7,60 segundos a 7,52 segundos, acadando un merecido 13º posto na clasificación xeral.
Xa pola tarde, David Lago Alonso participou na proba de 800 metros, onde logrou unha valiosa medalla de chocolate. Mellorou tamén a súa marca, pasando de 2:07 a 2:02 minutos. Cabe destacar que David, ademais, foi gañador da Olimpiada Galega de Informática na mañá dese mesmo día, o que lle permitirá representar a Galicia na XXIX Olimpiada Española de Informática en abril.
Desde o Club de Atletismo de Redondela, queren felicitar a todos os atletas por estes logros tan importantes, que son froito do seu traballo e dedicación. O futuro segue prometendo grandes momentos para o atletismo galego.
