Os equipos locais de fútbol sala viviron unha xornada con vitorias clave e empates. A SD Pazos de Borbén FS brilou cunha contundente vitoria que reforza o seu posto na táboa, mentres que outros conxuntos, como o Redondela FS ou o Campito Chapela FS, lograron sumar puntos nunha fin de semana de emoción e intensidade nas pistas.
En Terceira División, a SD Pazos de Borbén FS fixo valer a súa forza como local e venceu ao Outeiro de Rei SD por 7-3, afianzando así o seu terceiro posto na táboa. Os de Pazos están a realizar unha tempada moi boa e seguirán loitando pola parte alta da clasificación. O equipo mostrou a súa ambición tras coñecer os traspés dos seus rivais directos, como destacaron en redes sociais: “Serios, esa é a palabra que mellor define aos rapaces de Matilla no día de hoxe. Éramos sabedores dos traspés dos nosos rivais directos, e os vermellos saíron convencidos de sumar tres puntos que nos consolidan na terceira praza da competición.” No seguinte encontro, visitan ao Sala Ourense 2014, equipo situado na metade da táboa.
En Preferente, o Redondela FS sumou unha importante vitoria na súa visita ao Pecheches FS, cun resultado de 4-3 que lles permite ascender ao segundo posto da clasificación xeral. Un triunfo clave para os de Redondela Rodavigo, que se afianzan nas primeiras posicións. No seu vindeiro compromiso, xogarán como locais e recibirán ao SD Abertos Gondomar FS.
O encontro, correspondente á vixésimo primeira xornada da liga rexional preferente, disputouse o pasado sábado 15 de febreiro no pavillón Pista Vermella (Travesas-Vigo) ás 20:00 horas. Foi un partido complicado fóra de casa ante un rival incómodo, no que o equipo de Redondela soubo manter a calma e sobrepoñerse á presión exercida tanto polos xogadores coma pola afección local.
A primeira metade concluíu cun 3-2 en contra para os visitantes, debido a unha certa falta de acerto de fronte á portería e a algúns erros defensivos que complicaron o desenvolvemento do xogo. Con todo, tras o descanso e coas correccións tácticas oportunas, o Redondela FS saíu con máis tranquilidade, apostando por un xogo máis elaborado e paciente en ataque. Froito deste enfoque, o equipo logrou darlle a volta ao marcador cun 3-4 definitivo que certificou a remontada.
Nos minutos finais, o Pecheches FS intentouno con xogo de cinco, pero a defensa visitante mantívose firme e evitou o empate, garantindo así a vitoria do Redondela FS.
A afección do Redondela tamén xogou un papel fundamental, animando ao equipo en todo momento e sendo unha parte clave do éxito. Como aspecto negativo, os seguidores visitantes lamentaron a decisión de cobrar entrada, algo inusual ao longo da tempada.
Con este triunfo, o Redondela FS mantense na segunda praza, a tan só dous puntos do liderado, e seguirá loitando por sumar máis vitorias. No seu próximo compromiso, xogará na casa recibindo ao SD Abertos Gondomar FS.
Os goleadores do partido foron Mario, Álex, Sandro e un gol en propia meta do rival.
Na mesma liga, o Campito Chapela FS logrou un empate a 4 contra o A Quinta de Tui FS como visitante, un resultado que, aínda que non é unha vitoria, permite sumar un punto valioso no seu camiño. No seguinte duelo, xogarán na casa ante o Balona Linense FS, pechacancelas do grupo e moi necesitado de puntos para evitar o descenso.
Mentres tanto, o Arealonga FS tamén sumou un punto ao empatar 4-4 contra o CD Beade no seu propio pavillón. Este resultado permítelles saír da última praza da táboa, colocándose agora como penúltimos. A fin de semana que vén, desprázanse para enfrontarse ao Vianariño FS, líder da categoría.
Unha xornada que deixa sensacións mixtas para os equipos de Redondela e Bisbarra, pero con varios puntos que permitirán seguir mellorando nos encontros vindeiros.
