O desfile de comparsas que se celebra este sábado día 22 contará cun total de 12 formacións eserá o punto de partida dunha ampla programación que se prolongará ata o 5 de marzo, data na que se celebrará o Enterro da Sardiña, unha cita que o goberno local decidiu recuperar seguindo a tradición.
O Entruido en Soutomaior comeza co seu desfile de comparsas que se celebrará este sábado, 22 de febreiro. Unha cita que comezará ás 17:30h. con saída dende a rúa Calvario.
Neste desfile participarán 12 comparsas e estará encabezado polo pregoeiro deste ano “Juan de Arcade”, un home popular e coñecido no concello. O desfile partirá ás 17:30h. dende a rúa do Calvario cun primeiro “tramo silencioso” ata o Cruce de Cima de Vila. A continuación continuará ata Talo Río, onde está previsto que ás 20:00horas teña lugar a lectura do pregón. A festa seguirá coa actuación do Trío Azabache.
Ao día seguinte, domingo 23 de febreiro, celebrase un Obradoiro de máscaras tradicionais que terá lugar na Casa da Cultura Rexina Míguez Noval, en Soutomaior, e estará impartido por Rafa Quintía e Pili Silva. Un obradoiro, de balde, onde se van a realizar as máscaras do xeito máis tradicionais, como se facían no pasado, con materiais naturais e restos de teas. As e os interesados en inscribirse poden facelo ata este xoves neste enlace.
O venres 28 as pequenas e pequenos do CEIP Manuel PadínTruiteiro desfilarán polas rúas de Arcade enchéndoas de luz e cor. Unha cita que dará comezo ás 10:30h. e sairá dende o cruce de subida do colexio. Neste desfile, grazas ao obradoiro que Quintíaofrecei neste centro, tamén sairán un grupo de Entruidos coas súas máscaras feitas para a ocasión.
O sábado 1 de marzo centrarase toda a actividade na Casa do Pobo da Pedreira, onde terá lugar o Encontro de Entruidos coa sesión vermú protagonizada por “FanfarriaFurruxa”, a continuación será o Xantar Veciñal do Galo con arroz, o grande protagonista, unha cita, onde dende o concello convidaron a todas as asociacións a participar nesta cita de reencontro e de unión do pobo. O menú terá un prezo de 15 euros e inclúe galo con arroz, bebida e sobremesa. As persoas interesadas en asistir deberán de mercar o seu ticket en calquera Asociación do Concello de Soutomaior. Tralo xantar terá lugar a Procesión deo Galo con xogos e actividades infantís e cunha verbena con música popular e co “Dúo Marema”.
O domingo, 2 de marzo, as pequenas e pequenos serán os grandes protagonistas coa súa Festa infantil: Quiquiriquí o galo corre aquí, unha cita onde as quiricas e quiricos farán moitos xogos populares e onde poderemos desfrutar do gran espectáculo de “Barafunda no galiñeiro”:
O martes de Entruido, día 4 de marzo, virá marcado pola fiada. Unha festa amenizada con música e baile tradicional coas pandereteiras de Gharghamala, pandereteiras de Aboal, as de Toutón de Pazos de Borbén, Pandereteiras de San Vicente e as da Hermida. Todo aquel que queira unirse está convidado a participar nesta Fiada do martes de Entruidoque se celebrará de 20:30 a 00:00h.
E para rematar o Entruido, o concello de Soutomaior volve a recuperar o enterro da sardiña, unha cita que terá lugar o 5 de marzo, mércores de cinza, e que sairá ás 19:30h. da Praza de Cima de Vila. O percorrido será dende a Praza, pasando pola rúa Xosé Solla para finalizar no campo da petanca onde despediremos a nosa sardiña. Un evento no que colaborarán a Banda de Música Artística de Arcade, a Asociación da Xesteira, a Asociación Moreira a Tope e a Asociación Cultural Miúdos.
Na parte de Promoción Económica o Entruido tamén chegará ao comercio e hostalería de Soutomaior co concurso Vaia Meco e co Entruido no Peto onde se repartirán máis de 10 premios entre as veciñas e veciños que merquen no comercio local. Accións na que participan máis de 25 establecementos do concello.
