O Concello de Redondela iniciará a próxima semana un plan de mellora do pavimento en oito camiños municipais, abarcando un total de 4.772 metros cadrados de asfaltado en sete parroquias do municipio. A actuación, cun orzamento de 91.718 euros financiados con fondos propios, será executada pola empresa Construcciones Caldevergazo e prevese que estea rematada en marzo, sempre que as condicións meteorolóxicas o permitan.
A iniciativa forma parte do compromiso da Concellería de Infraestruturas e Sostibilidade, dirixida por Roberto Villar, para mellorar o estado das estradas municipais, tanto con fondos propios do Concello como con recursos doutras administracións.
Detalle das actuacións por parroquia
- Cedeira será unha das parroquias máis beneficiadas con tres intervencións destacadas. No Camiño Coto do Coello, que dá acceso ao Colexio Vigo, asfaltaranse 580 metros cadrados en dous tramos. Ademais, atenderase unha solicitude do centro educativo para acondicionar unha parcela anexa, mellorando así a circulación e o aparcadoiro da zona.
- A obra de maior envergadura desta fase será, en Cesantes, a do camiño de Baixada da rúa Campo de Fútbol á rúa Pedro Floriani, onde se renovará unha superficie de 1.125 metros cadrados, reforzando o firme e pavimentando toda a estrada debido ao seu deterioro. Tamén en Cesantes, actuarase sobre o camiño Lugar de Vaqueiro, cun asfaltado de 220 metros cadrados e a aplicación dunha nova capa de 5 cm de grosor para reforzar o firme.
- En Quintela, renovarase o camiño Fogueteiro, cunha superficie de 720 metros cadrados. O vial, que actualmente combina tramos de aglomerado e formigón, será acondicionado cun novo asfaltado e a formación das pendentes adecuadas para garantir o correcto drenaxe das augas pluviais.
- No Viso, levarase a cabo unha mellora no camiño da Carreteira, nun tramo de 33 metros de lonxitude e 171 metros cadrados de superficie, que presenta fisuras e afundimentos. Para solucionar estes problemas, realizarase un recrecido que nivele o terreo antes de estender unha nova capa de asfaltado de 5 centímetros.
- En Reboreda, actuarase na estrada da Quintana, nun tramo de 131 metros de lonxitude e 786 metros cadrados de superficie, onde se reforzará o firme e se aplicará un novo asfaltado para corrixir as fochancas e fisuras actuais.
- No centro urbano de Redondela, mellorarase o camiño Subida á Estación, tanto no tramo que conecta coa avenida Ernestina Otero como no que enlaza coa N-552. En total, pavimentaranse 162 metros de lonxitude, o que suporá un asfaltado de case 900 metros cadrados.
- Na parroquia de Vilar, renovaranse 270 metros cadrados do camiño do Cusqueiro, que presenta un elevado deterioro. A intervención inclúe o reforzo do firme e a pavimentación do tramo máis afectado, cunha lonxitude de 60 metros.
O concelleiro Roberto Villar destacou que este proxecto permitirá mellorar a seguridade viaria e a accesibilidade en diversas zonas do municipio, incidindo especialmente en estradas que presentan problemas estruturais debido ao paso do tempo e ás condicións meteorolóxicas. “Seguiremos traballando na reparación e mellora das estradas e camiños de Redondela, tanto con fondos municipais como con financiamento doutras administracións”, subliñou.
